عنوان الموضوع : المسلي طبق جزائري
مقدم من طرف منتديات العندليب





المسلي


المسلي هذا الطبق التقليدي الرائع واللذيذ جدا
والذي مازالت العديد من اسر منطقتي محافظة عليه ولازم تعملو خاصة مع دخول شهر رمضان
ومن العادات الجميلة الرائعة التي مازلنا نعملو بيها انو لازم نذوقو من المسلي كيما نقولو عنا ما يتخباش صايم نبعثو منو لجار او قريب
وكل ما تمر في اواخرشهر شعبان بحي من الاحياء الا وتشم ريحة المسلي المغرية
وكاين بعض الاسر الي تعملو في عيد الاضحى وحتى خلال شهور السنة لانو اضافة الى البنة تاعو راهو يساعدنا على الطبخ السريع ويعوضنا على اللحم لما يكون ماكانش وحتى لما يتم اللحم تاع المسلي نقدرو نستعملو الايدام تاعو طبعا بكمية معقولة نفوحوبيه الطبخة تكون بنينة وفيها نكهة اللحم

طولت عليكم لاني في نفس الوقت نجاوب على اسئلة طرحوها عليا عزيزاتي تاع الكوزينة ولي طلبو مني نحطو موضوع
اذا نفوت للطريقة مع الصور لي توضح اكثر

ناخذ كمية من اللحم مقطع قطع متوسطة الحجم وانا في العيد نزيد معاه الضلوع لانهم يبنوه ومانقدرش نصدقهم او نهديهم اذا نستغلهم في المسلي
ناخذ كمية مليحة من الشحم ونقطعهم قطع صغيرة ومن الاحسن شحم الكلى ونزيد معاهم شحم الردى
نحطهم في اناء ثقيل في القديم كانو يطيبوه في اناء من النحاس يسموه السطل وتتوارثوا العائلات
انا عندي كوكوط قديمة من النوع الجيد عطتهالي امي هي لي نستعملها
نحط اللحم والشحم على نار قليلة ونزيد كمية مليحة من الملح هو لي يعقمو كمية مليحة كذلك من البصل المرابي ونخلوهم على نار قليلة جدا جدا





























 ومن اساسيات المسلي انو ما نعملوش ليه الماء خلاص راه يطيب في الماء تاع البصل باش يجي طري ولو عملنا فيه ولومغرفة ماء يتعفن ويفسد وما يصلحش وبلا ماء يجي يابس اذا راه يطيب في ماء البصل

شوفو البصل هنا كيفاه خرج الماء تاعو




نخليه يطيب على نارهادية جدامع التحريك من حين لاخر ونحرك من اسفل باش ما يلصقش بمغرفة خشبية ونظيفة وشايحة معناها ما نستعملهاش في طبخة اخرى
لما نمس اللحم ونلقاه نصف طياب يعني بدى يطرى نصب فيه كميه مليحة زيت عادي وتكون كمية الزيت حوالي 4 اصابع فوق اللحم

شوفو هنا قبل مانزيد الزيت




وهنا بعد لا زدت الزيت اللحم ما عادش يبان


نخليه يطيب حتى يبدى يعمل فقاعات كثيرة من فوق كيما نقولو نحنا كشكوشة ههههههه وتكون احمرار في جناب الاناء من داخل لازم نتاكد من هذا هنا نزيد كمية مليحة من الثوم مدروس مع لفاح الي هو تابل وكروية فقط وثوم طبعا ونحرك ونخليه يهز غلوة وحدة ونرمي مغرفة كبيرة فلفل حلو احمر مرحي ومغرفة كبيرة فلفل احمر حار مرحي كذلك للي يحب الحار طبعا ونطفي عليه ونفرغوه في الاناء لي راح نخبيه فيه ونخليه يبات بلا غطاء لانو كي نغطوه البخار يفسدو
يوم الغد نغطوه ونخبوه لي حين الاستعمال
















نجو الان للنصائح باش ما يفسدش المسلي
اول حاجة لازم يطيب مليح حوالي 3 ساعات
ومالازمش يكون فيه ولو قطرة ماء
كمية الملح تكون كبيرة نوع ماء وكي نطيب بيه ديما ما نكثرش الملح على خاطر هو مالح

لازم دائما لما نحركوه وقت الطياب او كي نهزو منو تكون المغرفة شايحة ونظيفة يعني نهزوه هو الاول ومن بعد نكمل المكونات الاخرى
الاناء تاعو يكون دائما مغطي
مانحطوش في مكان فيه الندى او في الكونجيلاتور نحطوه في البلاكار اذاكان طايب بطريقة سليمة او في الثلاجة

استعمالات المسلي
المسلي نستعملوه مكان اللحم في اي طبخة فيها طماطم الحلة تاع رمضان ماتحلى كان بيه في الماقرونة في البركوكش امممممممممم
في المحجوبة في المحمصة في العصيدة
نعملو بيه شكشوكة تجي تهبل وكنت شرحتها لام محمد تاج اذا كانت ما زالت تتذكر في احدى الكوزينات

طريقة استعمالو



 نضع قطع من لحم المسلي مع مغرفتين او ثلاث ايدام مانعملش الزيت ونزيد لفاح والطماطم تاعي ونطيب عادي
في المحجوبة كي نجهز الشكشوكة تاعها نزيد ليها قطع من المسلي وقليل من الايدام تاعو ونكمل نطيب الشكشوكة عادي تجي تهبل

البعض من اطباقي لي بالمسلي




الحلة تاع رمضان ونعملوها ثاني ايام البرد في الشتاء



الجاري يجي بيه يهبل



البركوكش



واذا كان عملت طبخات اخرى بالمسلي راح نحطهم

عزيزاتي نتمنى نكون افدتكم وراني وفيت بوعدي ام كوثر ام ماجد ام طيري الجنة رياحين جياد والعديد من العزيزات لي طلبو الوصفة
كل عام وانتم بخير










>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

مشكورة على الموضوع الرائع حنا مانديروهش لكن كاين بزاف اللي يديروه واكيد لو تفضلتي علينا بالوصفة نكونو شاكرين

__________________________________________________ __________

>>>> الرد الثاني :

وااااااااااااااااااااااااع سمسومة منين خرجتيلي خخخخخ.....حطيت روحي انا لولا...امممممممممممم دائمة الحمد نفسي نذوقو الله يبارك كلشي من عند اكيد بنييين و هااايل44444444444444444444444444444444444444444444 4444444444444444444444444444444444444444444444

__________________________________________________ __________

>>>> الرد الثالث :

يعطيك الصحة دائمة الحمد راكي محافظة على التقاليد ما شاء الله

بصحتكم

__________________________________________________ __________

>>>> الرد الرابع :

البنات الكونكسيون راهي تروح وتجي عندي راني نهبط جزء ونبقى نستى حتى ترجع

__________________________________________________ __________

>>>> الرد الخامس :

يعطيك الصحة دائمة الحمد شرح روووووووعة و المسلي تاعك يشهييييي...كيفاه ديرو الحلة مافهمتهاش اصلا وشيهيا...فالمحجوبة تستعملي لحم ولا غير ليدام امممم هااايل
جعلها الله في ميزان حسناتك