عنوان الموضوع : شكون على حق انا ولا هي؟؟ مشكلة
مقدم من طرف منتديات العندليب

سلام عليكم

قلبي معمر و ما لقيت وين نفرغو ؟ ما نعرف لاكان انا للي موش نورمال ولا هوما

حكايتي انني متزوجة منذ 7 أشهر مع العايلة ..... و موش اي عايلة مع حماتي و 5 بناتها في الدار و 6 متزوجات و و اخو زوجي و ولد عمه تاني ساكن معاهم

المهم لاننا عائلة ما تطلب غير الهنا ما شرطنا لا داري وحدي و لا والو قلت ان شاءالله ما يكون غير الخير و للعلم في الاول نهار الشوفة قالولي بللي بقاو 2 بنات برك في الدار و ما حكاوليش خلاص على ولد عمهمحتى من بعد عرفت بللي بقاو 5

المهم رضيت بالشي للي كتبهولي ربي و تزوجت

انا بنت عاقلة و والديا خاطيهم المشاكل و لهذا ما كنت نحب ندير و لا ندخل في حتى مشكل مع انه دايما نسمع و نطنش و نفوت

الى غاية يوم العيد حبيت نروح لدارنا في النهار الاول و نعايد والديا راجلي داني و جابني

كي رجعت للدار لقيت النار شاعلة و كانني درت جريمة و لا سرقت و الحكاية دارولها رجلين و مشات للبنات المتزوجات و الكل دخل روحو و انا قاعدة في النص بيناتهم و هوما غير يهدرو ما شفيتش على روحي غير كي تقطع فيا النفس ما قدرتش نتنفس

علاه الشي هذا كامل لانني في نظرهم عروسة و ماكانش لازم نروح النهار الاول لدارنا في تقاليدهم؟ ياخي ماهو لا قرآن لا سنة و والديا ابجل من اي تقاليد ولا كيفاه؟ رحت طليت عليهم و جيت ياخي ما حرقتش المسجد؟

المهم فوت ايام الله لا يشوفهم لواحد و ما حبيتش نكبر لحكاية

من وراها عندها اسبوع صديقتي ولدت و لانها قريبة راحت معايا ماما باركنالها و بموافقة زوجي و ربي شاهد عليا

كي رجعت للدار نفس الحكاية داروا عرس؟ حماتي قلبت الدنيا كيفاش نروح عندها و قالت لراجلي يا اما نقطع صحاباتي يا ما تفراش؟

و زادو دخلو بناتها في الحكاية و رجعت نسمع كلام جارح و انا في بيتي قاعدة

واش درت؟ و زيد انا حامل ما راعاوش لا نفسيتي لا ظروفي لا والو

ما هدرتش معاهم الصباح قلت لزوجي نروح لدارنا لانني نفسيتي كانت في الحضيض

من بعد راح بابا حكا مع حماتي و قالها صحاباتها راهم خواتاتها ماشي صحاباتها و تفاهمو بللي ما نقطعش صحاباتي

حماتي قالت لبابا اوك و رجع بابا للدار

انا بقيت في دارنا حتى تهدأ اعصابي شوية

غدوة من داك عيطت حماتي لماما قالتلها ارواحي نتفاهمو و من بعد عقبتلها سلفتي المتزوجة و رجعت تحكي كلام يحبس الراس؟ و قالت لماما صبرنا على بنتك بزاف ؟ على واش صبروا؟ كي رحت لدارنا نهار العيد و رحت باركت لصاحبتي؟

اصلا هي واش دخلها في الحكاية ؟ و حماتي علاه قالت لبابا متفاهمين و من بعد دارت في كلامها؟

انا عييت و ما نقدرش نعيش مع عقليات كيما هكا

رايكم يا خاوتي و لا كان راني غالطة قولولي في واش غلطت؟ هل من حق حماتي تتحكم فيا و زوجي موجود و راضي على كل واش راني ندير فيه؟

لو كنت مثل العرايس للي نشوفو فيهم كون راني انا للي ندير في المشاكل باش نخرج بداري وحدي لكن كي شافوني ساكتة و قانعة رجعوا يديرو من الحبة قبة؟ رضيت بالهم و الهم ما رضاش بيا

دار زوجي بانيين و نورمالمو يبنيلي طابق من فوق باش نعيشو فيه لكن ظروفه الآن لا تسمح

و امه من الاول رافضة فكرة الكراء و هو خايف تغضب عليه

كيفاش ندير بعد الشي للي هدروه و خاصة اخته المتزوجة للي ما قادرتش ماما ما نقدرش نولي لتم خاصة مع نفسيتي الآن و حملي

الكلمة الطيبة صدقة يا خاوتي لا داعي للتجريح للي فيا مكفيني


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

ربي يفرج عليك سباب المشاكل هوما الخواتات الله يهديهم يعمرو أمهم وهي ما صدقت أنا نقولك مازال ماشفتي والووووووو هادا وين بديتي بسم الله رايي ارجعي علي وجه راجلك وديري الي تحبيه وخليهم يهدرو وأخت راجلك الي طيحت لامك ماتزيديش. تحكي معها هوما هادا وش يحوسو يخربولك دارك ماتعطيهمش فرصة ماتقلقيش روحك قادر يرتفعلك ضغط دم الحمل وتحصلي والله صعيب عن تجربة اضحكي ازهاي. قلشي راجلك واقتليهم بالبار د واسناي كي تولدي مسلسل وحدو هههههه اضحكي وفرفشي الدنيا قصيرة عيشيها وإياك تسمحي في راجلك ربي يعينو مسكين الي فيه يكفيه ربي يفرج عليك

__________________________________________________ __________

>>>> الرد الثاني :

السلام عليكم
راكي حامل انتهلاي فروحك
كان الله في عونك احيانا كي تجي في ام الزوج تقولي نفوتلها ولكن لما توصل لاخواتو ويتعاونو عليك بزاف خصوصا انك حامل
انها الغيرة خصوصا انك عاقلة هوما غير يحوسو على الغلطة حتى يعملو منها حديث الساعة الان زوجك لم يحرك ساكنا خصوصا مع اختو للمتزوجة واللي ماقدرتش امك
الحل في رايي ان والدك يتكلم مع زوجك وحدهم غير بالعقل ويتفاهم معاه انك زوجتو هو لا لغيره وانه لا يحق للغير التدخل وايضا انك لا تحبين ان تهان والدتك فكما تحترمين امه وجب عليهم احترام امك وايضا انت لما تكوني مع زوجك حاولي معاه بالشوية انك تحبيه وتحبي الهنا معاه ولوكان جات غير فالوالدة تفوتيلها لكن التدخلات الجانبية هي اللي هلكاتك
ناس كيما هاذو مايبغيوش العاقلة لانهم يعفسوها يحبو وحدة واعرة او ربما الصامطة اللي تعملها لتحت لتحت

ربي يعينك ويفرج عليك وويسهل ولادتم على خير

__________________________________________________ __________

>>>> الرد الثالث :

السلام عليكم


الله اعلم واظن ان كل مطالب السكن المستقل للمرأة اصبحت مشروعة بفعل تكرر مثل هذه الصراعات بينكن وتمايل الزوج بين زوجته وامه

__________________________________________________ __________

>>>> الرد الرابع :

والله غير الصبر يفوت لمحاين ماتخليهم يهنوا يماك ديري داركم خط احمر وماتخليهم يفسدوا بينك وبين زوجك اصبري ويفوت كل شئ

__________________________________________________ __________

>>>> الرد الخامس :

كيما قالو الاخوات هدرتهم ديرى وذن سمعت ووذن ما سمعتش .عيشى حياتك . اطهلاى فى راجلك وفى روحك راكى حامل
الحمد لله راجلك معاك وما تخبريهمش كل شىء كيما كى رحتى عند صاحبتك علاش تقوليلهم المهم راجلك علابالو .هذى حياتك انت وراجلك عيشيها بالطول والعرض ما تعيشى حتى لواحد المهم ما تعايبيهمش واقتليهم بالباردة