عنوان الموضوع : قصص من القران بلهجتي
مقدم من طرف منتديات العندليب

السلام عليكم ورحمة الله تعالى وبركاته

اليوم جيتكم بموضوع جديد ان شاء الله تكون فيه فائدة للجميع ومن كثرة لي تعجبني قصص الاسلام بغيت نجتهد شوية ونحكيهالكم بلهجتي باش يكون فيها شوية متعة وتشويق

الكل مرحب بمشاركاته بأي قصة

أتقبل كل أنواع النقد والتصحيح بخصوص أي معلومة خاطئة لكن في حدود الاحترام والأدب



أول قصة هي قصة حياة واسلام "سلمان الفارسي" رضي الله عنه

سموه الفارسي لخاطرش النسب تاعه كان من بلاد فارس وهو كان ولد رجل غني وزعيم للفلاحين ومن كثرة اللي بوه كان يبغيه ويخاف عليه كان حابسه وساجنه فالدار

الديانة تاع سلمان الفارسي كانت المجوسية وكانو مقدسينها بزاف لدرجة انهم ماكانوش يخلو النار تطفى

وفي وحد النهار رسله بوه لوحد الضيعة كانت عنده وهو رايح فالطريق فات (مر) على كنيسة سمعهم يصلو عجباته التراتيل اللي كانو يقولو فيها فقرر باش يعرف هاد الديانة ويدخل فيها بصح كي شور للدار خبر بوه بواش سمع وقرر بصح بوه رفض وحطله سلسلة في رجليه وحبسه

سلمان الفارسي بعث للقساوسة باش يروح معاهم للشام ونجح باش يسلك روحه وسافر معاهم ثم عاش مع وحد القس يخدم فيه ويتعلم منه بصح كان يشوف فيه صفات وتصرفات ماكانتش تعجبه مثلا كان يدي التبرعات لنفسه ومايعطيهاش للفقراء

هادا القس مات وجا واحد اخر من وراه بغاه بزاف سلمان لخاطرش كان زاهد فالدنيا وكي بغا يموت وصى سلمان باش يروح عند رجل فالموصل فيه نفس الصفات وهكا قعد سلمان كل ما يجي يموت قس يرسله عند قس في بلاد اخرى حتى في اخر مرة قال له القس نبعثك لرجل مبعوث من دين ابراهيم ياكل الهدية ومايقبلش الصدقة وعنده علامات نبوة وخاتم في كفاه (قفاه) كي تشوفه تعرفه

سلمان كان ورث بزاف البقرات والغنم من ترحاله وخدمته عند القساوسة وفي وحد اليوم شاف قافلة عرض عليهم باش يعطيهم البقرات والغنم بشرط يوصلوه لجزيرة العرب بصح فالطريق خدعوه وباعوه لواحد يهودي في بلاصة يقولولها وادي القرى من بعد زاد اشراه رجل اخر هو تاني يهودي داه معاه للمدينة وكي شافها سلمان عرفها بلي هادي هي البلد اللي وصفوهاله وقعد في قباء حتى بعث الله نبيه محمد صلى الله عليه وسلم وفي وحد النهار دخل (سلمان الفارسي) على الرسول في وحد المجالس كان فيها مع اصحابه قاللهم " عندي طعام نذرته صدقة وكي قالولي على مجلسكم هذا قلت بلي انتوما احق بيه" رد الرسول عليه الصلاة والسلام لصحابه " كولو بسم الله" بصح هو ماكلاش

سلمان قال في نفسه "هادي الصفة اللولة مايكلش الصدقة"

الغدوة رجع سلمان لمجلس الرسول وقاله بلي سمعت بلي ماتكلش الصدقة واليوم جبتلكم هبة (هدية) قال الرسول صلى الله عليه ويلم

"كولو بسم الله " وكلا معاهم

سلمان قال في نفسه هادي الزاوجة ياكل ويقبل الهدية""

فاتت الايام وكان الرسول رجع من جنازة وكان لابس برنوس دايره على كتافه سلمان قعد يحاول باش يشوف خاتم النبوة بين كتاف الرسول صلى الله عليه وسلم وهو عرف نيته راح منحي البرنوس من على كتافه باش سلمان يتأكد

سلمان شاف الخاتم كيما وصفوهله ركع تحت رجلين الرسول صلى الله عليه وسلم وقعد يبكي نوضه الرسول وسقساه على قصته و أسلم

كتب الرسول لسيد سلمان اللي كان مالكه باش يحرره وطلب من الصحابة باش يعاونوه ورجع سلمان مسلم حر وشهد عدة غزوات مع الرسول صلى الله عليه وسلم أشهرها غزوة الخندق واللي فيها نصح سلمان المسلمين باش يحفرو خندق باش يتقو شر الكفار

سلمان الفارسي كان يكره الامارة وقال " إن استطعت أن تأكل التراب ولا تكونن أميرا على اثنين فافعل"

موت سلمان الفارسي

سلمان كان مخبي حاجة عزيزة عليه بزاف عند مرته ونهار قرب يموت طلب منها باش تجيب له واش راه داس عندها وكانت سرة تاع مسك وطلب منها باش تجيبله شوية ماء ورش هاديك الريحة تاع المسك من حوله وقاللها راه حدايا ناس ماياكلوش ومايشربوش بصح يبغو ريحة المسك وطلب منها باش تروح وتبلع الباب من موراها

كي ولات بعد شوية لقاته مات وراحت روحه الطاهرة لمولاها



حكيتكلكم القصة باختصار لطول سيرته وانجازاته وخصاله

ان شاء الله مايكونش فالقصة خطأ عن غير قصد

و ان شاء الله تعجبكم

الى حين قصة اخرى تقبلو مني فائق الاحترام والتقدير
سلام



>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

السلام عليكم ورحمة الله تعالى وبركاته


ثعلبة رضي الله عنه كان الخادم تاع النبي وكان يرعى قاع الأمور تاعه وفي وحد النهار رسله الرسول عليه الصلاة والسلام باش يقضي له حاجة وهو فايت (مار) حدا دار تاع واحد من الانصار شاف امرأة تستحم قعد يشوف فيها وطول فالنظر بصح حس بالرهبة وخاف ينزل الوحي على الرسول صلى الله عليه وسلم ويخبره بواش دار ثعلبة
هرب ثعلبة وخزن في وحد الجبل بين مكة والمدينة وقعد ربعين يوم
نزل جبريل على محمد صلى الله عليه وسلم وقاله " يا محمد ، إن ربك يقرئك السلام ويقول لك أن رجلاً من أمتك بين حفرة في الجبال متعوذ بي"
قال الرسول صلى الله عليه وسلم لعمر بن الخطاب وسلمان الفارسي "انطلقا واتياني بثعلبة"
كي جابوه سقساه الرسول صلى الله عليه وسلم
فقال له : ما غيبك عني يا ثعلبة ؟
 قال : ذنبي يا رسول الله
 قال : أفلا أدلك على آية تمحوا الذنوب والخطايا ؟
 قال : بلى يا رسول الله .
 قال : قل (ربنا آتنا في الدنيا حسنة وفي الآخرة حسنة وقنا عذاب النار) .
 قال : ذنبي أعظم
 قال رسول الله : بل كلام الله أعظم ثم أمره بالانصراف إلى منزله فمر من ثعلبة ثمانية أيام
 فقال رسول الله : فقوموا بنا اليه دخل عليه الرسول صلى الله عليه وسلم وحط راس ثعلبة في حجره بصح ثعلبة بعد راسه من حجر الرسول صلى الله عليه وسلم
فقال له : لمَ أزلت رأسك عن حجري ؟
 فقال : لأنه ملآن بالذنوب .
 قال رسول الله ما تشتكي ؟
 قال : مثل دبيب النمل بين عظمي ولحمي وجلدي .
 قال الرسول الكريم : ما تشتهي؟
 قال : مغفرة ربي ،
 فنزل جبريل فقال : يا محمد إن ربك يقرؤك السلام ويقول لك لو أن عبدي هذا لقيني بقراب الأرض خطايا لقيته بقرابها مغفرة فأعلمه النبي بذلك ، فصاح صيحة بعدها مات على أثرها
أمر الرسول صلى الله عليه وسلم باش يغسلوه ويكفنوه وكي صلى عليه الرسول صلى الله عليه وسلم قعد يمشي على راس صباعه ( أطراف أنامله) غير كمل الدفن سقساوه "يا رسول الله رأيناك تمشي على أطراف أناملك ؟"
قال الرسول صلى الله عليه وسلم :" والذي بعثني بالحق نبياً ما قدرت أن أضع قدمي على الأرض من كثرة ما نزل من الملائكة لتشييع ثعلبه"
{ ربنا آتنا في الدنـيا حسنة ، وفي الآخرة حسنة ، وقنا عذاب النار}
حاولت قدر الامكان مانحولش الاقتباس في قول الرسول وجبريل وثعلبة الى اللهجة الدارجة احتراما للشخصيات العظيمة
ان شاء الله تكون عجبتكم القصة كيما عجبتني وأثرت فيا
سلام


__________________________________________________ __________

>>>> الرد الثاني :

السلام عليكم و رحمة لله تعالى و بركاته
شكرا لك بارك الله فيك اختي جزاك الله خير ان شاء الله

__________________________________________________ __________

>>>> الرد الثالث :

المشاركة الأصلية كتبت بواسطة التعيسة المتفائلة
السلام عليكم و رحمة لله تعالى و بركاته
شكرا لك بارك الله فيك اختي جزاك الله خير ان شاء الله

وفيك بارك الله الشكر ليك اختي على اهتمامك ومرورك بالموضوع فرحني بزاف


__________________________________________________ __________

>>>> الرد الرابع :



__________________________________________________ __________

>>>> الرد الخامس :

بارك الله فيك