عنوان الموضوع : مشكلتي مشكلة
مقدم من طرف منتديات العندليب

السلام عليكم،
أرجو تغيير العنوان الى "ليست بمشكلة انما..."

في الحقيقة لا أدري كيف سأبدأ موضوعي، أنا فتاة في 16 من عمري ، من صغري كانت عندي وحدة الحاجة منعرف اذا هي لي يسموها الحاسة السادسة ولا لا لا، المهم كنت نقدر نتعرف على أشياء منعرفهاش من قبل أو على أشخاص درك نعطيكم أمثلة مثلا كيما كنت صغيرة كان أبي كيما يخرج يسهر و أنا كنت نحب بزاف نلعب معاه كنت نسناه حتى يجي و نقول في نفسي درك أبي على 9.35 يجي و بالفعل في نفس الساعة و لا دقيقة ناقصة جا وصراتلي قداه من خطرة.

مرة خلاف صديقة لي كانت تحكيلي على زميل لها قالتلي مبعد نوريهولك مبعد أنا كيما شفتو قلت هذا هو لي هدرتلي عليه صديقتي و قلتها هكاك عشوائيا في نفسي و مبعد قلتلها لصديقتي اسكو هادا هو استغربت بزاااااااااااف و قالتلي كيفاه عرفتي مع أنها ماوصفتلي فيه والو.
أيضا هذي الأمور تجيني في دهني فجأة مثلا أشخاص جامي يجو في بالي و كيما يجو في بالي تصرالهم حاجة درك نزيد نحكيلكم،

صديقتي تقرا معايا عندها خوها كبير و يعني جامي هدرنا عليه ولا، وحد لخطرا فليل حتا لقيتو جا فبالي و هو جامعي ولات تجيني وحد الأفكار عليه يعني أفكار عادية وليت نقول ايهـ معرف كيفاه يقرا هو دركا و سييير يتواحش فاميلتو و ختو ((صديقتي ))باسكو بعيد عليهم مي حتى لقيتو جا في بالي غدوا من ذاك تعرفو وش صرا !!!؟؟ مات بحادث سيارة كيما كان فطريقو لعند فاميلتو...و أنا جاني أمر غريب بزااااااااف

أيضا مرة كنت في دار أقربائي و كنت وحدي في المطبخ سحقيت حاجة كيما جيت خارجة لفتت انتباهي ساعة الحائط كانت تشير الى الساعة 8.55 ليلا و كان عقرب الساعة يروح ويجي ف الدقيقة 55 لثواني و منبعد كملت الساعة تمشي نورمال و في هذيك اللحظة لي كان العقرب يروح و يجي فالدقيقة 55 ((يعني للرقم 11 )) قلت أنا في نفسي فجأة غدوا تصرا حاجة على الساعة 11 هكاك هدرتها عشوائيا ومبعد قلت اييهـ أني أنا برك خرفت هههـ
غدوا من ذاك تصدقو بلي على الساعة 11 ماتت عمتي!!!!

تاني مثلا كيما نلقا أقربائي يهدرولي على كانش واحد مثلا نعرف قبل مايهدرولي بلي كانو رايحين يهدرو عليه و منقولهمش حتى يهدرولي باه نولي نبتسم مع روحي باسكو كنت عارفة من قبل ههـ
أقسم بالذي خلقني أني منحكيش من نسج خيالي و هذي كاامل صح صراتلي و كاين بزاااااااااااااف مواقف أخرى صراتلي مع العلم مش داااااائما و في كل وقت تصرالي

أنا مهدرت حتى لواحد على واش يصرالي،، مي حبيت نعرف من عندكم موالف تسمعو بهكا حالة؟؟و هل هي نعمة أم شيء غريب و يزول أم ماذا؟؟ و ما هي هذي الحالة أصلا؟؟ مع العلم أنا راضية بهذي و ما نتمناهاش تزول حقيقة.

والسلام عليكم


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

أولا :لا تعتقدي أنك غريبة عن الآخرين أو متميزة ...............

ثاينا : لا تعيري لهذه الظاهرة أي إهتمام................لأن زيادة إهتمامك سيجعلك تؤمنين بأشياء كارثية ....

أبقي عادية ...........................

__________________________________________________ __________

>>>> الرد الثاني :

أختي عليك كيما يقولوا بالستر و ما تحكيش أفضل كاين منها و شخصيا كانت تحدث معي

احمدي الله و انسي الأمر و لا تفكري فيه لا تشغلي بالك ، اهتمي بأمورك الأخرى بدينك و مستقبلك

أتمنى لك التوفيــــق

__________________________________________________ __________

>>>> الرد الثالث :

خلعتيني يا اختي انا كانت تصرالي في الاحلام حتى وليت نرقي وكانت متعجبنيش بصح مدام انت ماشي مقلقاتك يعني عادي متهتميش للموضوع بزاف

__________________________________________________ __________

>>>> الرد الرابع :

اخطيك من هاذ الهدرة واتمسكي بالله
لا حاسة ساتة لا سابعة مجرد تهتريف

__________________________________________________ __________

>>>> الرد الخامس :

عادي
لأنك مازلت صغيرة و الطاقة تاعك زايدة شوية
تكبري و تولي تخسري الطاقة تاعك على تفاهات الحياة
و تروح هذي الأمور معاها


https://www.youtube.com/watch?v=MuSogccXrEk