عنوان الموضوع : مشكلتي مع اختي مشكلة
مقدم من طرف منتديات العندليب

السلام عليكم ورحمة الله وبركاته
مشكلتي مع أختي....مانقدرش نفهم عقليتها ...بزاف ....تكون نورمال معايا تضحك وتفضفضلي ووو بصح حاجة تاع والو تنقلب وحدها وماتوليش تهدر معايا وما نعيا نجبد فيها ماتقيمنيش وماترد عليا...وأنا والله العظيم عمري ولا خسرت معاها ...مرات تطيح من قدري وتقول لي كلام يجرحني بصح نقول ماعليش هاذي اختي الكبيرة بصح بزاف ماعييت صابرة وكرهت من معاملتها ليا ...مرات نحب نهدر معاها تلعبها راهي منشغلة بالتلفاز أو بشيء آخر.........لكن علاه تعاملني هكا ...وعندي اختي الصغيرة مهما دير معاها ماتعاملهاش كيما أنا تتكلم معاها نورمال وتضحك وووو أما أنا ؟؟؟؟مافهمتش ....هاذي الي توجعني بزاف :tears:مرات نحس بلي تغير مني لأن أسلوبها معي هو الي يحسسني بغيرتها...ملي توقفت عن الدراسة أو بالأحرى بويا هو الي حبسها أما أنا كمت قرايتي وتخرجت من الجامعة وراني نخدم....بصح أنا شادخلني وماهو ذنبي؟؟؟؟ختى الخطابة يتقدمولي أكثر منها ....بصح ربي ماكتبش...مرات يقولولي أنت عندك الزهر...بصح وين راه الزهر ...تا حاجة ماهي تكمل لي :0000454564:
علاه تعامل اختي الصغيرة عادي وماتقولها والو وماتزعفش منها رغم أنها هي تاني راهي تكمل قرايتها في الجامعة وماتدير والو في الدار وتنوض كيما تبغي وتقضي كيما تبغي بصح ولاأحد يتكلم معاها....أما أنا نخدم وندير شغل البيت ووووو بصح ماعنديش الزهر معاها وكون حاجة صغيرة ننسى باه نديرها تحكمهالي وتشنف وماتوليش تهدر معايا وتتجاهلني .....كرهت كرهت خاصة راني في كونجي...وانا انسانة حساسة حاجة صغيرة توجعني ونقعد غي نبكي بصح مانبينش رغم ان قلبي ابيض ومانشد الحقد ...مرات نقول بالاك تحس بالنقص سيرتو مين ماكملت قرايتها رغم انها كانت طالبة ممتازة بصح الله غالب وتاني راهي قاعدة في الدار....تكون معايا مليحة وغاية بصح مين تنقلب عليا الله يستر ....ومين تولي كيما كانت بالاول وكأن شيئا لم يحدث...انا انسانة اجتماعية وليس بإمكاني التعامل والتأقلم مع هذه النماذج البشرية المتقلبة الطباااااااااااااع.


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

الشيء الي تكلمتي عليه هو شيء عادي ويحدث في اغلب الاسر بما انك الاخت الي بعدها ..حتى ولو ظروفها غير الي قلتي كان ممكن كلشي راح يكون نفسه...واما عن طباعها المتقلبة ماتنسيش انها اليوم كامل في الدار راح تكون ضايقة روحها ..ربما تحس انها بلا فائدة بلا ونيس ...وممكن هي حابة تبينلك انها محتاجة ليك لكن هي ما تعرفش تعبر عن نفسها ...انتي بما انك تخدمي ممكن ساعة على ساعة تشريلها حاجة او تقترحي عليها تخرجوا مع بعض للتسوق ...خذي رأيها وحسسيها ان قلبك كبير وليها فيه مكان كبير .........والله أعلم

__________________________________________________ __________

>>>> الرد الثاني :

ممكن في سن المراهقة فهو اصعب مراحل الحياة لازم واحد يهز على الاخر يكون عقلو كبير ويسمح شويا في حقو باش تصلح الامور ولسني اول واحدة ولستي الاخيرة سياتيك يوما تتمنين هذه اللحظة

__________________________________________________ __________

>>>> الرد الثالث :

السلام والله اختي قصتك تشبه فتاة اعرفها نفس القصة الا ان هاذه هي عاملة معي انسانة ميزاجية لابعد الحدود ومنطوية ومبهمة لا احد يستطيع ان يفك لغزها ولا اسرارها دائما تقرا الحزن في عينيها ولا تستطيع ان تساعدها لانها لا تثق في احد وهي من الجنوب الشرقي وتسكن في اقصى الجنوب الشرقي ومشكلتها انها كانت ممتازة ولها احلام وقف ابيها في وجهها عندما منعها من الجامعة رغم انها حصلت على الباكلوريا بعلامة جيدة في وقت كان قليل من يحصل على هذة الشهادة واختها تقرى في الجامعة واخوانها الذكور كذالك وحتى ان الزواج نمنع اي خاطب يتقدم لها وتقول انه ينوي الشفقة عليها فقط ربي يفرج على الجميع

__________________________________________________ __________

>>>> الرد الرابع :

يجى نهار تتوحشي طبايعها

__________________________________________________ __________

>>>> الرد الخامس :

للاسف الكثير من البنات اغيرو من اخواتهن

تصرفي عادي معها انها اختك