البرك التركية على طريقتي طريقة جزائرية
عنوان الموضوع : البرك التركية على طريقتي طريقة جزائرية
مقدم من طرف منتديات العندليب
اهلا اخواتي
عندي قداه وانا نقول نحطلكم طريقة عمل البرك التركية و تفنيت من رمضان و اليوم نعلت الشيطان و قلت نحطهالكم مدام الصور تاع الموضوع ليكونت راح نديرو في رمضان كاينة و مراحتش
الطريقة هذي نستعملها في اغلب عجائني سيرتو اذا حبيت لعجينة تجي مقرمشة و بالطبقات في بلاست العجينة المورقة كي ماتكونش عندي في البقلاوة تجي بقلاوة رووووعة لكلاوها يدومندي لاغوسات و الطريقة مانطولش عليكم نعطيلكم الوصفة وان شاء الله تعجبكم ( الصور راهم تع رمضان في هذيك الوقت ليصورتها كنت مديسيديا نحطهالكم في هذاك الوقت مي مكتبتش )
المقادير
انا استعملت 2 كيلات فرينة و اذا ماتحبيهاش مبسسة استعملي 4 كيلات فرينة
2 كيلات فرينة
1/2 كيلة زيت
خميرة الخبز عينك ميزانك
ملح
ملعقة صغيرة سكر
ماء دافئ للعجن
نشا
الحشو
فرماج رابي
بصلة مقطعة
ثوم مقطع
دبشة+معدنوس
حبة فلفل حار و حبة فلفل حلو مقطع مربعات
زيتون اخضر "انتبهي للملح لأنو مالح و تقدري ديري زيتون مغلي و لا تستغني عنو كيما تحبي "
ملح
فلفل اسود
تقدري تضيفي اي نوع توابل تحبيه
نحتاج ايضا الى 1/2 بيضة او صفار بيصة + شوية حليب + شوية نسكافي و نخلط مع بعض باش ندهنو الوجه ()
جلجلانية+سينوج
الطريقة
العجينة
نخلط جميع المكونات الجافة مع بعض
و نلمها بالماء الدافئ
و نخليها ترتاح و تتخمر "اذا ديرتيها مبسسة كيما انا مراحش يبان فيها التخمار مليح ولكن تحسي لعجينة نتاعك ريحت و اما اذا ديرتي 4 كيلات فرينة راح يبان عليها التخمار لأنو الأولى مبسسة و الثانية لالا "
الحشو
نقلي البصل و نخليه يذبل شوية و مبعد نضيفو الفلفل الحار و الحلو و الزيتون و نخليوهم يذبلو مليح و نزيدو الثوم باش ماتتحرقش
و مبعد نزيدو اللحو و نتبلوهم و نخليوهم يطيبو كيما راهي موضحة الصور كي يطيب نزيدولو الدبشة+ المعدنوس
[FONT=Lucida Sans Unicode]
نرجع الى العجينة
بعد ماتكون ريحت مليح
نرش على طاولة العمل نشا و ماتكثرش باش ماتيبس العجينة و نحلها و نرش عليها النشا ثاني مانكثرش ( النشا الزايد نحيوه) و نطبقها كيما راهي موضحة في الصور و مبعد نزيد نطبقها باش نتحصل على مستطيل نرقق هذاك المستطيل بسمك حوالي 0.3 ملم
نقصوهم مربعات و نحشيهم بالحشو و ندير فوقو الفرماج و ندهن الأطراف باش كي نطبقو على 2 يلصق و نضغط عليه بالشوكة
الصور تشرح الخطوات
و نغلق الربعات و ندهنها بالخليط البيض و الحليب و النسكافي و نزينها بالسانوج و الجلجلانية و الى الفرن حتى طيب و نحمرها من فوق و نقدمها
و شهية طيبة
شوفو الطبقات و القرمشة تاع العجينة والله بنينة
بالنسبة ل 4كيلات فرينة
لعجينة تخرج كيما هكذا
نكمل بنفس الطريقة
بالنسبة ليا نفضل الطريقة الأولى لأنو تجي مقرمشة كثر و مبسسة و اقرب الى العجينة المورقة
كل ما ديرولها طبقات بزاف كل ماتجي مورقة
نسيت نقلكم كل ماتبقوها تجي فيها طبقات بزاف
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
اممممممممممممممممممم بارك الله فيك وجعله في ميزان حسناتك
__________________________________________________ __________
>>>> الرد الثاني :
المشاركة الأصلية كتبت بواسطة ام رزيقة 
اممممممممممممممممممم بارك الله فيك وجعله في ميزان حسناتك
و فيك بركة
فرحني مرورك
__________________________________________________ __________
>>>> الرد الثالث :
مممممممممممممممممممممممممممممممممممم روعة ما شاء الله بارك الله فيك
__________________________________________________ __________
>>>> الرد الرابع :
444444444444444444444
__________________________________________________ __________
>>>> الرد الخامس :
امممممممممم يعطيك الصحه وأكيد بنيييييييينا
رد مع اقتباس
