عنوان الموضوع : شكشوكة السيبيا والشومبينيو المطبخ الجزائري
مقدم من طرف منتديات العندليب

السلام عليكم أحبتي في الله واش احوالكم لاباس
هي أكلة سهلة وبسيطة بصح بنينة أولا نجيبو السيبيا نقوها مليح أنا هدا واش نكره فيها تشد الوقت وخدمتها سامطة وممبعد نغسلوها ونقطعوها مربعات صغار ونغلوها حتى طيب مليح
ونجيبو الشومبينيو نغسلوه ونقلوه في شوية زيت ونحوه في هاديك المقلة نخدمو صوص تومات عادي زوج مغارف زيت كبار شوية مليح كي تجي مزيتة شوية وحبة طوماطيش وسنينات ثوم ووقات رند وشوية معدنوس وملح وكمون وفلفل أكحل والحار إذا حبيتي أو الهريسة نقلوهم شوية ونمرقوهم بشوية ما برك لاخاطر كلش طايب كي يبدا يغلى لوحيلو الشومبينيو والسيبا اللي تكوني غليتيها حتى طابت
وكي تشرب طفيلها وشهية طيبة ، أكلة بنينة وساهلة سيرتو لاعطيتي لراجلك يسقملك السيبيا مايبقالك والو ، أنا سقمتها وحدي ظهري تكسر ماكملتها مزية عاونتني سلفتي يعطيها الصحة
هاياك صورة السيبيا قبل وبعد ماتتنقى شكلها بشع بصح طعمها بنين ، طبعا الصور من النت أنا كنت مقلقة كي كنت نسقم فيها ويديا كاااااااارثة على هاديك ماقدرتش نصور









وهادي الشكشوكة بعد ماطابت





ملاحظة برك أنا متعودة نزيدلها صدر دجاج مقطع مربعات ومقلي في شوية زيت يزيدلها البنة ولا الكروفات مع القرنيط اللي هو الأخطبوط بصح اليوم ماكانش عندي درتها غير بالشانبينيو


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

الله يبارك
عمري دقت هاد الاكلة
شاطرة بصحتكم

__________________________________________________ __________

>>>> الرد الثاني :

المشاركة الأصلية كتبت بواسطة أم ماجد
الله يبارك
عمري دقت هاد الاكلة
شاطرة بصحتكم

الله يسلمك حبيبتي ام ماجد انا راجلي يموت على الماكولات البحرية بكل انواعها حتى مرات نوض نبكي نكون عيانة ويزيد يجيبهلي نسقمهم
ربي يحفظك حنونة مشكورة على الرد

__________________________________________________ __________

>>>> الرد الثالث :

يعطيك الصحة على الافادة شكرااااا

__________________________________________________ __________

>>>> الرد الرابع :

نحب نقولك بلي راني امية في السيبيا عمري ما طيبتها
يعطيك الصحة فهمت طريقة الطياب وباينة بنينة خاصة من يديك
بصح كفاش انقيها هذي انت الي موالفتها وحصلتي انا كفاش وواش نخلي وواش نرمي ههههههههههه
كاش نهار نقول لراجلي يديني ناكلها في كاش مطعم المهم نذوقها
موضوع رائع
الهم زدني علما

__________________________________________________ __________

>>>> الرد الخامس :

يمي يمي
عمري لا ذقتها مي من يديك اكيد بنينة
بصحتكم عزيزتي