هيا نلعب بالبيتزا لالالا طبخ جزائري
عنوان الموضوع : هيا نلعب بالبيتزا لالالا طبخ جزائري
مقدم من طرف منتديات العندليب
الوصفة 12 بيتزا مخادعة
صباح الخير على عيون أحلى حراير
بعد نجاح الحلقة 1 و 2 من مسلسل اللعب بالعجين ، جبتلكم الحلقة 3 ، اليوم رايحين نلعبو بالبيتزا
هما 3 وصفات هايلين نتاع بيتزا : الأولى وصفة نتاع تورت بالعجين السائل و الثانية وصفة بيتزا كيما اللي تتباع أكيد كامل تحوسو عليهاوالوصفة الثالثة تورت اقتصادية نتاع مشومرين هههههه ، نبدأ بمشيئة الله :
* تورت بالعجينة السائلة تشبه البيتزا
هاذي الوصفة شفتها في 2 منتديات وقلت نجربها وكي العادة كي عجبتني قلت نفيدكم بيها ، راهي ساهلة وسريعة و خفيفة كأنها سفنج ننصحكم جربوها خاصة لما مايكونش عندكم وقت ، أنا طبعا عدلت في الوصفة :
* في خلاط تحطو كاس حليب + 4 بيضات + 8 ملاعق كبيرة فرينة + ملح ( ماتكثروش لأن فيها من بعد جبن و زيتون أخضر مالحين ) + 1 ملعقة كبيرة سكر + 1 كيس خميرة الحلويات + 1/4 كاس زيت ، يخلط الكل ثم :
* ندهن الصينية بالزيت ونسكب نصف الخليط ( هذا الخليط راهو يعمل 2 تورتات ) ، شوفو حجم الصينية نتاعي :
* نقطع 4 حبات جبن و نوزعها فوق الخليط ، ثم نسكب فوقها صلصة الطماطم على شكل قطرات و نزين حسب الرغبة ، أنا درت معدنوس مقطع + زيتون أخضر مقطع + دوائر من الباتي و جبن مبشور و إلى الفرن المسخن مسبقا على درجة 200° ( تعاملو معاها كأنها كيكة ) ، راهي ماطولش في الطياب ( حوالي 15د ) ، أنا ندخل فيها سكين إذا طلع ناشف يعني طابت
* حمروها من فوق و قطعوها و قدموها ، راهي هشة جداهاذي التورتة الثانية حمرتها بزاف ( نسيتها في الفرن
) :
شوفو واش رقيقة :
وهاذي القرصة الأولى زينتها بحبة بطاطا مغلية + 4 حبات جبن :
* ملاحظة ، لما تصبو الخليط في الصينية رايح يبانلكم قليل ولكن راهو يتضاعف حجمو ما تخافوش
* ممكن تستعمو ورق الزبدة إذا حبيتو
الوصفة 13 : بيتزا 100/100 كيما اللي تتباع في المحلات
هاذي الوصفة لعيون أختي ouricia ، هاذي مدة وهي تقولي حطي الموضوع و ماكانش عندي الوقت ، راهي مهداة ليك:
المقادير نتاع قرصة واحدة :
* كاس فرينة
* ملح
* 1 ملعقة كبيرة سكر
* 1/4 ملعقة كبيرة خميرة
* شوية محسن خبز
* 1/2 كيس خميرة الحلويات
* 1 ملعقة كبيرة زيت
* 1/2 بيضة
* 1 ملعقة كبيرة حليب بودرة ( اختياري )
* ماء دافئ للعجن
*نخلط المكونات لنتحصل على عجينة طرييييية وماشي جارية ( يعني صبعك يدخل فيها بسهولة ولكن ما تلصقش من بعد لما تقرصيها)
* نشعل الفرن يسخن 30 د قبل مانبدا الطياب و نحط الصينية اللي رايحة نطيب فيها مقلبة تسخن
* نخليها تخمر
* نرش الطاولة بالفرينة و نحلها بالحلال ، هنا رايحين تستناو نقول حلوها رقيقة ، لا لا ، حلوها ماشي رقيقة بزاف وإلا جي يابسة من تحت وتتقرمش وما شي طرية
* أنا ماعنديش اللوحة اللي يستعملوها باش يرميو البيتزا في الفرن و هنا الحاجة أم الاختراع
* حاولي تحركي الكرتون باش تتأكدي أن القرصة ماهيش لاصقة في الكرتون
* هنا ساعة الصفر ههههه ، أرمي القرصة في الفرن بمحاولة أنك تخليها تزلق من الكرتون إلى الصينية ما تقرصيهاش بعد ما ترميها
* خليها طيب و تنتفخ ودير فقاعات كيما البيتزا اللي تتباع ولما طلي عليها من تحت وتلقايها قريب طيب
* خرجي الصينية شوية برك من الفرن يعني نص داخل ونص خارج وحطي بسرعة صلصة الطماطم ، زيتون مقطع ، شرائح باتي ، معدنوس مقطع ، زيتون أسود ، جبن ( حسب الرغبة ) وبسرعة عاودي دخليها للفرن تكمل طياب 5 دقائق وخرجيها نحيها من الصينية و قطعيها و قدميها ساخنة
هاذي صورة البيتزا في الفرن وأنا نزين فيها ( استعملت صلصة الموزاريلا المخادعة ماعنديش جبن مبشور
https://www.djelfa.info/vb/showthread...C7%D1%ED%E1%C7
شوفو كيفاش طرية و مطاطية و السمك نتاعها مليح :
التزيين راهو ناقص و لكن شوفو للعجين ناجحة 100/100
* ملاحظة : طيبوها في الرف الوسط نتاع الفرن وعلى أعلى درجة حرارة ممكنة .[/COLOR][/SIZE][/FONT]
* نحب نقول انو هاذي النتيجة وصلت ليها بمساعدة الأخوات اللي هنا في المنتدى ، نشكرهم بزاف
الوصفة 14 ، تورت اقتصادية
بقاتلي عجين نتاع بيتزا حق قرصة و المكونات الأخرى حق 2 قرصات ، قلت باش مانفسدش ، نديرلكم هاذي التورتة :
نحيت شوية من العجين احتفظت به و الباقي قرصتو في الصينية بعد ما دهنتها و حطيت صلصة طماطم و فوقها باقي المكونات ( وزدت معاهم حبة بطاطا و حبة باذنجان مقطعة مكعبات و مقلية ) و قسمت العجين اللي احتفظت به إلى 8 كريات صغيرة و برمتهم بين يدي باش نشكل حبل و العجين يرجع مطاطي مايتقطعش
و حطيتهم بهذا الشكل :
خفقت بيضة مع م ص حليب سائل و م ص عسل ورشة ملح و دهنت بيها حبال العجين و الباقي صبيتو فيو التورتة وزينت الحبال بالسينوج والجلجلانية وإلى الفرن
راهي بنينة وخفيفة و طريييية
تحياتي للجميع
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
روعة تاكلوهم بالهناء
dazili sahmi rani nastana ya ilhammmmmmmmmmmmmmmmme
__________________________________________________ __________
>>>> الرد الثاني :
أوااااااااه نتي وحدك في المنتدى راهم يهبلو شهتيني يعطيك الصحة يا لعزيزة
ربي يهدي هدوك الناس باش نفرحو بيك قريبا هههههه ياخي علابالك شكون هههه
هكدا تروحي لدارك و تهبلي راجلك كيما راكي مهبلتنا آآآآآآآآمييييين و الله راني ندعيلك من قلبي
__________________________________________________ __________
>>>> الرد الثالث :
فحلة فحلة فحلة تسلمي يا الغالية واله هذا ما نحب ناكل غيرالبيتزا
جوعتيني في هذا البرد والثلج واكيد جميع البيتزات الي درتيهم ليا وحدي
__________________________________________________ __________
>>>> الرد الرابع :
ااااه يا مخادعة حتى البيتزا تلعبي بيها لعب ههههههههههه والله برافوووووووو روووووعة هايلة
__________________________________________________ __________
>>>> الرد الخامس :
للاسف الصور لم تظهر شكراااااااااااااااااااااا
رد مع اقتباس
