عنوان الموضوع : جواز الباذنجان بالبطاطا اقتصادي وبنين طبق جزائري
مقدم من طرف منتديات العندليب



السلام عليكم احبتي في الله واش حوالكم
مع قروب شهر البركات شهر رمضان الكريم
ومع هاد السخانة
؟؟؟

كيما شفتو في موضوع سابق طبق جواز الباذنجان بالبطاطا
طبعا بما انني نباتية ونحبش اللحم والدجاج مكانش متوفر ههههه مدرت والو انتم تقدرو تديرو يجي هايل

المقادير هنا على حساب عدد افراد العائلة الكريمة وهي:
بطاطا حلو او بطاطا بيضاء
باذنجان
فصوص ثوم حسب الذوق انا نحب طعمو درت 4 فصوص كبار هههههههه
بصلة كبيرة
فلفل حار وحلو
حبة طماطم كبيرة
زيتون اسود وممكن ايضا اخضر
الطريقة:
نقي الباذنجان واغسليه وقطعيه دوائر وحطيه في بورت مونجي فيها ماء وملح وعصير ليمون
فائدة الماء والملح انها متخليش الباذنجان يتشرب بزاف زيت عند القليان ويجي ميدم وثقيل
وفائدة الليمون انو ميخليش الباذنجان يكحال اي يحافض على لونو الجميل
نخلوه على الاقل 2 سوايع انا في الحق ديما نقشرو في الليل ونخليه في الثلاجة من تحت ونستعملو غدوة من ذالك ميشربش الزيت يجي يشهي
من بعد نقلو الباذنجان

ونقشرو البطاطا انا درت ضعف كمية الباذنجان ونقطعوها تاني دوائر ونقلوها

ونقشرو البصل ونقطعوه جوانح رقاق نوعا ما ونقطعو الفلفل دوائر ونرابيو الثوم ونحطهم في طنجرة ونزيدلهم شويا زيت فقط ونخلوهم يتقلاو جيدا ثم نضيفو شوية ملح ماشي بزاف لانك لو تتذوقي البانجان تلقايه عندو ملح

من بعد نزيدو الحبة الطماطم مقطعة تاني طوليا نخلوها تتقلى شويا

ونزيدو كاس ماء وملعقة صغيرة هريسة وفلفل عكري "فلفل احمر مرحي حلو" وبعض التوابل انا زدت الكون والكروية وحبة الحلوى وفلفل اسود ونرمي حبات الزيتون في المرق ونخليها تطيب حتى تعقد وتطيب الخضر (البصل والفلفل والطماطم) جيدا

من بعد نزيدو الباذنجان

ثم البطاطا

ونحرك برفق من فوق للتحت ونخليها حوالي 2 دقائق مع رفع الغطاء ثم نطفي النار

انا هنا موالفة نزيدلها جبن مبشور ونخليه حتى يذوب بفعل الحرارة شوية ونقدمها
هاهي

من الجهة الاخرى

تفضلو همهم راهي بنينة متراطيوش

ان شاء الله تعجبكم لانها اقتصادية وبنينة وتصلح في موسم الحر
باي






>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

الله يعطيك الصحة
طبق لذيذ بصحتك

__________________________________________________ __________

>>>> الرد الثاني :

90 مشاهدة ورد واحد هل هذا كل عجز ولا وحدة فيكم معجبها الموضوع
في الحق هدا كلو يصيب بالاحباط
شكرا على مروركن



__________________________________________________ __________

>>>> الرد الثالث :

شكرا اختي على مرورك

__________________________________________________ __________

>>>> الرد الرابع :

تبارك الله ملشاء الله يهبل يهبل ماتزعفيش تكفينا فحولتك الله يبارك وكليوم تنورينا بحاجة

__________________________________________________ __________

>>>> الرد الخامس :

ya3tik essaha khti,vraiment recette ta3 had elwakt,m3a slata khadra mmm,sahiti meditili fikra ta ghda