عنوان الموضوع : كسرتي المطلوعة الإسفنجية والرخسيس اللذيذة يم يم يم يمي طريقة جزائرية
مقدم من طرف منتديات العندليب

السلام عليكم



بالنسبة للمطلوعة

خبزة هي حفنة مليحة تاع اليدين سميد و الخميرة استعملت لي تجي حباتها صغيييرة جدا مقدار ملعقة صغيرة معمرة لكل خبزة والملح حسب الذوق

الطريقة : نحط الدقيق في القصعة ومن جهة أخرى نحط الخميرة ندفي الماء ونحط شوية فوق الخميرة باش تذوب

ثم نبلها بالماء عادي ماهي يابسة ماهي طرية ونغطيها بقماش ونخليها ترقد، الوقت اللازم هو حتى تطلع ونشوفها انتفخت ولازم في جو دافي يعني موش في كوزينة النافذة فيها مفتوحة مثلا٠

ملاحظة مهمة في الخطوة السابقة لا أضع الملح لأنو يقتل الخميرة نخليه كي نبدا نعجن

المرحلة الثانية هي العجن : نجيب الماء الدافي و نذوب فيه الملح

ثم نبدى نعجن بإضافة الماء المملّح تدريجيا نزيد بشوية ونعجن

حتي تطرى مليح ونحسها بدات تعمل فقاعات تحت يدي في النهاية

نلمها بشوي زيت باش ما تلصقش و يزيدها بنّة و ندخلو فيها مليح

ثم نقسمها إلى كويرات من الأحسن تكون صغيرة باش تجي الخبزة صغيرة و نهزها بسهولة أثناء الطياب لأنو كي تعود كبيرة راح تتحل بين اليدين كي تتهز لطراوتها وتهبط في الطاجين٠

نفرش فوق الطاولة ونحط الكويرات ونخبزها موش رقيقة ولا خشينة ياسر باش تجيك عملية الخَبْز سهلة لأنها طرية غبريهم بشوي فرينة و اخبزي وهكذا ما تلصقلكش في القماش نغطيها و نخليها تطلع في الدفء ثم نطيبها

الأشياء المهمة

- ما تحطيش الملح مع الخميرة

- اعجنيها وطريها بإضافة الماء المملح بشوية بشوية

- لميها بالزيت في الأخير اخبزيها بحجم صغير باش ما يفسدش شكلها أثناء الطياب

- ومن الأحسن تخبزوها قريبة من الطابونة باش كي تهزوها مباشرة الى الطاجين ما تعذبكمش لأنها طرية

وضرك تفضلوا معاي باش تذوقو كسرتي الإسفنجية هشة
ومعمرة ثقوب






















وهاذي كسرة رخسيس لذيذة

أما الرخسيس نحط سميد على جنب وشوية زيت على جهة نحط في الزيت شوية خميرة قليلا فقط وطبعا الملح منبعد

نحط شوي ماء فوق الخميرة والزيت باش تذوب ثم نخلط ونزيدليها الماء الدافيء كي نلمها في الأخير نذوب الملح في شوي ماء و ندخلو طبعا موش طرية ياسر نغطيها ونخليها ترقد ومنبعد نعجنها مليح بإضافة مكعبات صغيرة من الزبدة تخليها لذيذة جدا ندخلهم مليح بالعجن نقسمها كويرات و نزيد نخليها ترقد شوي (شبعت نوم ) ومنبعد نخبز بالوحدة و نطيب و هكذا














طبعا مع اللبن ولا ألذ ٠٠٠٠نشرب اللبن حتى في الشتاء










تقييمكم يهمني

يا لبنات اعذروني كتبت يااااااااسر

نتمنى نكون افدتكم .............وأي سؤال آني هنا





>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

يعطيك الصحة انا المطلوع هبلني لبارح زدت جربتوا و منجحتش فيه حتى كرهتوا

__________________________________________________ __________

>>>> الرد الثاني :

ما هي مقادير و طريقوة الرخسيس

__________________________________________________ __________

>>>> الرد الثالث :

يعطيك الصحة انا تاني نحب اللبن في الشتاء

__________________________________________________ __________

>>>> الرد الرابع :

روعة روعة بارك الله فيك هاذو اول حاجة تتعلمهم الطفلة عندنا

__________________________________________________ __________

>>>> الرد الخامس :

هههههههههه

فول بلا زريعة

مادامك حطيتي الصور

زيدي تكرمي علينا وعطينا المفادير وطريقة التحضير