عنوان الموضوع : قوارب البطاطا المحشية بالدجاج والجبن بطريقتي من مطبخي
مقدم من طرف منتديات العندليب

السلام عليكن حبيباتي وحشتوني وحشتوني
كيما علابالكم جاية السخانة وجاي شهر رمضان عما قريب بحول الله وماينفعو غير الاطباق الخفيفة والساهلة راح نقدملكم طبق خفيف من مطبخي وعلابالي يعجب عائلتكم وخاصة اولادكم


كمية من البطاطا حسب افراد عائلتك من الافضل تكون متوسطة ماشي كبيرة وتكون كلها من نفس الحجم تنقيها وتقسمي كل حبة على 2 عرضيا وتخويها من الداخل بملعقة حتى تولي طبقة رقيقة حتى تطيب بسهولة مالازمش تخليها خشينة




ماترميش هاد البطاطا انا نحطها في كيس وندخلها للكونجي لاتور وكي نجي نعمل لاسوب نحطها مع باقي الخضار ولا ممكن تستعمليها للحشو نتاع القوالب كيما عملت انا في آخر الصفحة



اقليها في زيت غزير على نار متوسطة حتى تطيب من الجيهتين وديريلها شوية ملح وحطيها فوق ورق طبخ تتقطر






تحضري صوص بلونش ببصل وثوم وشوية معدنوس مقطع وفلفل اسود وملح وشوية كسبر مرحي وتقليهم مع كمية من صدر الدجاج وتمرقي بالماء وتزيدي حفنة جلبانة ولا زيتون اخضر ولا حمص حسب الرغبة انا عملت جلبانة تخلي الكل يطيب
كي يطيب الدجاج خليه يبرد وفتتيه



زيديلو حبة طماطم كبيرة مقطعة مربعات ومعدنوس وحشيشة مقطعين وملح وفلفل وزيدي البيض حتى تتحصلي على خليط كيما الصورة مالازمش يكون ناشف وممكن تضيفي خضر حسب الرغبة ممكن بيضنجان او بصل او قرعة





عمري القوارب نتاع البطاطا وحطي في وسط كل قارب قطعة جبن طرية ودري على الوجه شوية جبن مبروش انا عملت شيدار




في مول نتاع فرن حطي كمية من الصوص وستفي فوقها القوارب



ودخليها للفرن على 180 من 20د الى نصف ساعة حتى تستوي حبات البطاطا مليح من تحت مع الصوص ويتحمر الجبن من فوق



وقدميها مع رشة معدنوس وليمون


زووووووووووووووووووووم



هادي عملتها بزيتون اخضر في مكان الجلبانة والحشو زدت فيه البطاطا اللي نحيتها من الوسط فورتها شوية وخلطتها مع الدجاج والبيض وماعملتش الطماطم ماكانتش عندي والوجة ماعملتلوش الجبن المبروش دخلتو مباشرة للفرن





نتمنى ينال اعجابكم وراني نستنى رايكم وتقييماتكم وبلا ماننسى تطبيقاتكم



>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

الله الله عليك نينا راكي كما البدر المنور تطلي علينا بنورك اطباقك روووووعة تشهي بارك الله فيك على الابداع واصلي الافادة في ميزان حسناتك ان شاء الله

__________________________________________________ __________

>>>> الرد الثاني :

المشاركة الأصلية كتبت بواسطة oum ibrahim
الله الله عليك نينا راكي كما البدر المنور تطلي علينا بنورك اطباقك روووووعة تشهي بارك الله فيك على الابداع واصلي الافادة في ميزان حسناتك ان شاء الله

ربي يحفظك حبيبتي ام ابراهيم دائما سباقة بردودك النيرة
العفو حبيبتي والله الافكار والاطباق موجودة لكن ماعنديش بزاف الوقت سامحوني حبيباتي انا مادابيا نكون ديما معاكم
نورتيني حبيبتي


__________________________________________________ __________

>>>> الرد الثالث :

الله يبارك شاطرة...جوعتيني يعطيك الصحة

__________________________________________________ __________

>>>> الرد الرابع :

وصفة رائعة يعطيك الصحة و امتعينا بالمزيد من وصفاتك التميزة

__________________________________________________ __________

>>>> الرد الخامس :

حبيباتي لينات وروفية سارة نورتوني بردودكم الطيبة ونوعدكم بالجديد