السلام عليكم
هادي 3 طرق من اللي معتمدتهم في تحضير السمك خاصة السردين حبيت نفيدكم بيها لكن انا نوريلكم المقادير نتاع كمية قليلة وانتوما ضاعفوها على حسب افراد الاسرة
ا
ولا ساردين مقرمشة
ساردين منقي ومغسول مليح +2سنات ثوم مرحية+عصير نصف حبة ليمون تخلطي الكل مع بعض
للتغليف كمية من الدقيق او السميد الخشين+كمية من الفرينة+ملح+مغرف كمون
تغلفي ساردين مليح بالخليط
وتقليها في زيت ساخن من الجيهتين حتى تحمار
حطيها فوق الورق الماص
وقدميها
جي مقرمشة جدا ومايبانش دوق السمك بزاف ويحبوها الاطفال بكثرة بنت اخي الصغيرة ماتاكلش الحوت بصح كي نديرو هكدا ديما تاكلو
هاذا النوع الثاني اللي نحبو بزاف وهو ساردين فارسي
المكونات
حسب كمية الحوت اللي عندك انا ماعملتش بزاف على هادا الحشو قليل
4سنات ثوم مرحية+دبشة مقطعة+ملعقة صغيرة كمون+ملح +ملعقة طماطم مصبرة+ملعقة هريسة
للتغليف دقيق +فرينة مع شوية ملح
خلطي الكل مع بعض حتى يندمج الحشو وتحطي كمية منو فوق لحبة الساردين وتغطيها بحبة تانية من نفس الحجم
تغلفيهم مليح بالدقيق المخلط مع الفرينة خاصة الجواني حتى مايحترقش الحشو وتقليهم في زيت غزير حتى يتحمرو
تقدميهم لوحدهم ولا مع بطاطا مقلية وسلاطة
الطريقة الثالثة طريقة امي ربي يحفضها هي موالفة تعملها بسمك المارلو ومرات بالساردين
-ساردين بينيي
المكونات
بيضة +فنجان صغير حليب+ملح+شوية كون+2سنات ثوم مرحية تخلطي الكل مليح وتزيدي الفرينة بالشوية مع نصف ملعقة صغيرة خميرة الحلوى حتى تتحصلي على خليط ثقيل
اغطسي فيه حبة الساردين من الجيهتين واقليها مباشرة
كملي بنفس الطريقة مع باقي الحبات وحطيها فوق الورق الماص وقدميها
وفي الاخير نتمنى تعجبكم وتجربوها راني بانتظار رايكم
سمك الساردين بثلاث طرق مقرمش+فارسي+بينيي من مطبخي طبخ جزائري
رد مع اقتباس
