عنوان الموضوع : تعالوا وشوفوا احلى البوقالات الجزائرية للتسلية
مقدم من طرف منتديات العندليب

تعالوا وشوفوا احلى البوقالات الجزائرية



السلام عليكم ورحمة الله تعالى وبركاته

سنتطرأ في بادئ الامر الى التعريف بهذه اللعبة

البوقالة هي لعبة من التراث الجزائري القديم توراثنها عن اجدادنا حيث النساء يتفنن في ابتكار امثال و حكم على الطريقة و اللهجة الجزائرية و كانت و لازالت تلعب خاصة في مناسبات حيث تجتمع النسوة كالافراع والاعياد وبالخصوص السهرات الرمضانية
التي تنتظم في العادة داخل البيوت حيث تتكفل إحداهن باستضافة جمع من النسوة أغلبهن عازبات حول أطباق الحلوى والشاي، وتقوم بتحضير إناء فخاري (يسمى بوقالة) وتضع فيه قليلا من الماء، ثم تطلب من كل واحدة منهن نزع خاتمها ووضعه داخل الإناء، ثم يتم تغطية الإناء بقماش ناعم.
و تكمن متعة البوقالات حسب اسقاط معاني تلك الأشعار الشعبية أو الألغاز التي تلقيها في العادة عجوز طاعنة في السن على النسوة الحاضرات، وتقضي قواعد اللعبة ان تنوي البنات عقد النية على شخص ثم تعقد أي شئ تملكه خمار او خيط المهم تعقد شئ وتنوي في بالها شخص معين لتري فالها او حظها مع هذا الشخص ....
تقوم العجوز بقول بوقالة وكل البنات مصغيات فاذا كانت البوقالة جميلة وفالها حلو تجد كل الفتيات متشوقات حتى يعرفن من صاحبة البوقالة الجميلة وكل وحدة تتمنى تكون هي صاحبتها
واذا كانت البوقالة كلامها فال سىء او حزين فتجد كل واحدة خائفة من ان تكون هي صاحبة البوقالة ....
بعد الاستماع تخرج إحداهن او احدا البنات الصغيرات خاتما من اإناء-البوقالة، و تقع البوقالة على صاحبة الخاتم .
هذه اللعبة من تقاليد و التراث الجزائري و لا زالت متداولة حتى الان و في بعض الاعراس اصبحوا يقدمون البوقلات في وريقات صغيرة توضع في قفيفة صغيرة و يوزعنها على البنات و النساء الحاضرات كتسلية في الاعراس و كل واحدة تقرأ فالها
اليكم بعض من البوقالات و كل واحد ة و فالها الي يفتح اللعبة الاول يترك رد حتى تكون اللعبة من نصيبوا بس اعقدوا بالاول و انويها على شخص سواء قريب منك او بعيد (منقول)

بسم الله بديت وعلي النبي صليت وعلى الصحابة رضيت، عيطت يا خالقي يا مولاي يا مغيث كل مغيث، كملي في البوقالات واش نويت ياربي أعطينا الفال ولاقينا بولاد الحلال.
فال يا فلفال يا فاتح سبع قفال اجبر لي سعدي مهما كان ما الشرق و لا من الغرب ولا من الشمال
قولوا للضاق صبرو يشد في حبال الرجا وعلاش يتنكد... يتكل على الله ياك ربي العالي ما يضــــــــيع




1 عينيك توت وحواجبك ياقوت بنتكم نديها واللي بغي يموت يموت.
2 وردة في الكاس يضاربوا عليها بالمواس.
3 يا مولات السعد لبيض ربي يكملك، حوست قاع البلدان مالقيت مثلك، ربي يجيب حيلة من السماء وتكون من قسمي.
4 خرجت يوم الجمعة في يدي شمعة خرجت ليا جنية قالتلي مالكي يالولية حكيتلها ما بيا قاتلي روحي حاجتك راهي مقضية.
5 ياللي طالعين للجبل ادوني معاكم اذا بيكم علي الماكلة راني شبعانة واذا بيكم علي التحواس راني عيانة وذاك الشباب زرق العينين ما نديه غير انا.
6 بيني وبينك تويقة قد الكاس وبيني وبينك كلام واش وصلو للناس؟ مايكون الحيط حتى يسبق الساس وما يرفدو الذل غير بنات الناس.
7 أمك سماتك "علي" واسم "علي" عالي ويا واسطة في العقد يا نقش خلخالي الذل ما نحملو والعز رباني .
8 العدو واللي طعن الله يخيب مكرو والتراب اللي يعطش الله يسقيه بمطرو الليل راه مشى والنهار لاح بنورو.
9 درت الحنة في يديا وزدت في رجليا وراني ندعي في ربي وقتاش يفرج عليا.
10 ياللي قاعدة في الرياض وادور بفوطتها الحسن والحسين قاعدين قبالتها شافها السلطان قال نديها شافها الوزير قال نغنيها و أنا قلت من العين نحميها.
11 غالي غالي والغالي ربي مهما تروح وتغيب معزتك دايما في قلبي.
12 حب الملوك يا حب الملوك وحب الملوك مصدر في وراقو, نموت على حبيبي ومانصبر على فراقو.
13 رحت للسوق نشري الفلفل والكمون صبت راجل مذلول قالي: حبيبك راه عليك كي المهبول.
14 يا اللي زايدة في عذابي في النهار انومك و في الليل نترجاك أعطيني كلمة من فمك يرحم اللي رباك.
15 نسول عليك يالحبيب والسوال خير من ألف هنية ساعة على ساعة نفكر في الزمان ونقول علاش ألي تمنيتو ماهو ليا.
16 خرجت وحدي في الليل وخرجات الليل صعيبة انسيت المحنة والويل اتفكرتك انت يا الحبيبة
17 حب الملوك جاني مغلف في اوراقه انا وحبيبي في بلاد واحدة والقلب مشتاقه
18 عديان الجبال خطبت بنت الرجال و الي يقول كلمة في البنية عند الصبح تبان
19 حليت باب الجنان لقيت الملاح رقود تنهدت الدالية و تحرك العنقود قال القمر فالسماء نكشف على السحاب يذوب خلي الحبيب لحبيبو واللي في قلبو حاجة الله يبلغ المقصود.
20 نزلت لقاع البحر خرجت لي جنية قالت لي وشبيك يا لالا مهمومة تكلمي افتحي قلبك ليا قلت لها يا مولاتي هذاك حبيبي أداوه عليا قلبي معاه و قلبو معاها هيا.
21 يا لي جايا من العين و بيدك مليتي القلة سبحان من أعطاك أزين و زاد في بهاك ذيك الحلة.
22 النور يا النور و النور عينيا طبطبوا على الباب و جابو لي اللي عزيز عليا راني نتمنى من ربي يجي يطلب يدي من ماليا.
23 جاز عليا شباب في يده منديل ازرق و ششيته معنقرة و لبسته تبرق عليه نسمح في الولد و عليه نطلق وعليه نخلي البلاد ونردها خندق.
24 الشمعة يا لشمعة يا لشمعة الضواية لو كان نعرف وشبيك نمسح هذيك الدمعة من خديك و نرد وجهك مرايا يا ربي يا معبود اقبل دعاية يا رجع لي زهو الزمان ويعيا الحبيب قاعد معايا.
25 اطلعت للسطح و فرشت زربية حرقت حر قوس الذهب و حرقست عينيا أفرحي يا يما سعدي ولا ليا نستشفي فالعدو كما استشفى فيا.
26 فاطمة يا فطوم وين ما تكوني نرسلك مرسول إذا سكنتي البحر نرسلك عوامة وإذا سكنتي السماء نرسلك حمامة و إذا سكنتي القبر يحاسبك مولانا.
27 علاش يا لالا التخمام رحمة الله واسعة و كبيرة لو كان جات بالكلام نتحدثو و نعطوك تدبيرة بصح كل شي بالمكتوب ويعيا والخير يبان و تزول عليك الهموم و تروح الحيرة.
28 أعلميني يا لالا نهار تروحي لحمامك نرفدلك السلة و نمشي قدامك ندور على يمينك و نزيد على شمالك و نبقى لك خديم و طايع على طول زمانك.
29 السفينة اللي جات باش نلاقيها باللوز و السكر نرش سواريها و الورد والياسمين نهديه للركاب فيها و بالمسك و العنبر نعطر أماليها.
30 يا لشمس الضوايا يا العالية في سماك لو كان صبتك مرايا و نشوف وجهي بضواك يعود ربحي و غنايا و يقسم سعدي ذاك.
31 في الساقية الماء يجري و الحشيش نابت متخالف بالشوك مليت حجري من هذاك الراي التالف كي غبت و غاب زهري و لا اللي يجيني خايف.
32 أقعدت تحت النخلة قالولي دقلة نور جات أدور أطلعت فوق النخلة و بالعسل رشيت الصور معاه المعيشة تحلى حبيبي الساكن في القصور.
33 جيت ساميت البحر شفت الحوت يعوم عرفت ما عندي زهر في ذا الحظ المحموم كي غاب ضي القمر ما ردت ضي النجوم.
34 لو كان السعود ينغرسو نغرس ميات عود وعود في طية وحدي لكن السعود في يدك يا معبود يا سقام السعود سقم لي سعدي الناس الكل بحبيبهم وأنا غريب في هذا الدنيا وحدي.
35 أصلك أصلك و ما ينفع غير الصح مولاة النية و الخير ربي عليها يفتح طول ولا تقصر يجيها السعد والربح.
36 حبطت لقاع البحر لقيت شباب غايس، قلتلو: واش بيك غايس؟ قالي: سفينتي راهي بلا رايس، أنت تحبيني و أنا نحبك آجي ندخلوا عرايس.
37 الدمعه على الخد تجرح و كلامهم كي السيف يذبح و أنا غزالي ما نفرط فيه حتى نفرح و نستراح.
38 حبطت لقاع البحر و صبت الرمل يغلي، رفدت باليد ليمنى و حطيت في حجري نطق ليا الملك قالي يفرج ربي يجيك سالم غانم بجاه النبي العربي (عليه الصلاة والسلام).
39 ذبالت الدالية وذبال العنقود، الشمس تكشف والسحاب يقول ذنوب، خلي الخليل مع خليلتو وكلشي بالمكتوب.
40 شدني يا ماسي شدني من يدي من غيرك ما ندي يا حبيبي كلامك زين وسلامك ياسمين عندي.

يتبع الجزء التاني من البوقالات

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

27 علاش يا لالا التخمام رحمة الله واسعة و كبيرة لو كان جات بالكلام نتحدثو و نعطوك تدبيرة بصح كل شي بالمكتوب ويعيا والخير يبان و تزول عليك الهموم و تروح الحيرة. hhhhhhhhhhhhhhhhh ana lawàààààà lool

__________________________________________________ __________

>>>> الرد الثاني :

20 نزلت لقاع البحر خرجت لي جنية قالت لي وشبيك يا لالا مهمومة تكلمي افتحي قلبك ليا قلت لها يا مولاتي هذاك حبيبي أداوه عليا قلبي معاه و قلبو معاها هيا.
نويتها على روحي هادي ليجاتني صحيتي شحال نحب هذه اللعبة

__________________________________________________ __________

>>>> الرد الثالث :

رررررررررررررررائع

__________________________________________________ __________

>>>> الرد الرابع :

شكرا لمروركم حبيباتي

__________________________________________________ __________

>>>> الرد الخامس :