عنوان الموضوع : ممكن مساعدة في خبز الرخسيس طبق جزائري
مقدم من طرف منتديات العندليب

السلام عليكم يا شطرات
عجبني خبز الرخسيس كي رحت للشرق بنين بزاف يا ريت تعطوني وصفة ناجحة و نوعيه السميد المستعمل وادا نقدر نطيبو في طاجين الحديد و شكرا


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

حبيبتي شوفي كيلي الدقيق تاعك مثلا لقرصة رخساس ديري مغرف صغيرة سميد وشوية برك خميرة الكسرة وشوي سينوج ولا جلجلانية و2 فناجل زيت ولميها بالماء وأعجني حتان تولي طرية وماتكثريش الما باه ماتجيكش جارية المهم تجي طرية وسخني الطاجين تاعك مليح وحطيها تحمار من الجيهتين
والدقيق الممتاز حبيبتي كل منطقة واش الدقيق تاعها حنا هنا في باتنة كاين دقيق التل ولا تاع قسنطينة ولا بن عمر ولا تاع سطيف
نشالله نكون وفيت حنونتي نشالله هاذ اليومين نحطها موضوع وتستفادي انت والأخوات والأخت غزة في عيوني.

__________________________________________________ __________

>>>> الرد الثاني :

مساء النور
انت تقصدي خبز الرخسيس هو الكسرة نتاع الرخسيس لي نديروها نحن في الشرق
نحن في سطيف نديروها كالتالي:
سميد ممتاز + ملح حسب عدد الكسرات + زيت + خميرة الخباز + الماء وتلم ماتكونش يابسة وماتكونش جارية حطيها في ساشي بلاستيك باه تجي ساهلة للعجين وتتركيها في مكان دافئ لمدة نصف ساعة او ساعة
حطي طاجين المطلوع يسخن ويكون من الطين احسن لانو هو بعد يزيد في بنتها
جيبي العجينة وقسميها على حسب عدد الكسرات لي درتي وحليها بالحلال كيما الكسرة العادية وحطيها تطيب من الجهتين وما تنسايش تثقبيها
انا نحب الرخسيس بزاف لانو صح بنين
ادا كان عندك اي سؤال راني هنا

__________________________________________________ __________

>>>> الرد الثالث :

عزيزتي الكسرة نتاع الرخساس كيما نقولولها حنا في بسكرة تكون كالآتي

بعلبة الطماطم نتاع كيلو الفارغة نقيسو الكمية
علبة و ربع تعملك 2 رخساس متوسطين +1 م ص سكر + 1 م ص خميرة الخبز الفورية + 2 م ص ملح + 2 كاس شاي زيت
أخلطي الكل بالماء حتى تحصلي على عجينة طرية أعجنيها شوية بدون ماء إلا إذا شفتيها قاسحة شوية زيديلها شوية ما تكون طرية ماشي كيما نتاع المطلوع المهم تدخل بعضاها مليح و ما تعملش شقوق
ثم قرصيها و أثقبيها بالشوكة و طيبيها كيما تحبي سواء في طاجين الحديد أو الطين المهم تسخنيهم من قبل

__________________________________________________ __________

>>>> الرد الرابع :

ما شاء الله ... هذي كل ولاية عندها الرخسيس انتاعها سبيسيال هههههه ....

__________________________________________________ __________

>>>> الرد الخامس :

المشاركة الأصلية كتبت بواسطة zahra30
ما شاء الله ... هذي كل ولاية عندها الرخسيس انتاعها سبيسيال هههههه ....

علابالك يازهرة في كل ولاية كل عائلة عندها طريقتها الخاصة في الطبخ و في العائلة الواحدة كل يد عندها طريقتها في الطبخ كذلك ما تستغربيش