عنوان الموضوع : محجوبة مقلية (طريقة سرسورة)
مقدم من طرف منتديات العندليب

بسم الله.

المقادير

العجين
1 كلغ سميد رقيق واذا عندك خشين زيديلو شوي فرينة
1 مغرف اكل خميرة خبز
ملح
شوي سكر قيمة نص مغرف باه تجي حمرة ( السكر يحمر المعجنات)

الحشو
حبة بصل كبيرة او 2
1 فلفل حار
1 فلفل حلو
3 طماطم كبار
طرف صغير شحم او لحم مرحي او طون
ملح
2 سنات ثوم
زيت للقليان
فلفل اسود
التحضير :
ناخذ السميد نزيدولو الملح و السكر و الخميرة ونعجنو بالماء الدافئ كيما المطلوع ونخليوه يرتاح حوالي 20د على حسب الجو و كي يطلع نزيدو نعجنوه مليح و نزيدولو الماء و شوي زبدة المهم كيما المطلوع و مبعد نقرصوه قرصات صغار يكونو قد الصحن تاع القاطو ونخليوهم يزيدو يطلعو شوي وفي نفس الوقت نكونو حضرنا الحشو
نقصو البصل صغير والفلفل تاني ونديرولهم شوي زيت في مقللاة ونخليوهم حتى يذبال البصل و الفلفل واذا شفناهم راح يلسقو نزيدولهم شوييي ماء في نفس الوقت نرحيو الطماطم مع الثوم ونزيدو الملح و الفلفل الاسود
كي يذبال البصل نحطو فوقو الطماطم ونزيدو نرابيو فوقو شوي شحم ونخليوه يطيب
ومبعد لوحي شوي حشو في وسط القرصات وطبقيهم على 2 كيما لي شوصون(les chaussons) وزينيهم بالفرشيطة على الجناب
عمري المقلة بالزيت خليها كي تسخن مليح لوحي بالوحدة وقلبيها وصبي الزيت من فوق بالمغرف حتى تنتفخ وتحمار من كل الجهات حطيها تقطر في ورق مصاص (papier absorbant)
ملاحظة
من اجل محجوبة باللحم المرحي قليه مع شوي بصل وفلفل اسود وشوي ملح و ديري حساب الطماطم راهي مالحة ومع الاخير لوحيه شوي و طفي يجي بنين كي يطيب وحدو مداوي ومبعد خلطيه في الحشو
من اجل محجوبة بالطون مع الاخير لوحي باط طون تاع الزيت وخلطي مليح الحشو

شهية طيبة


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

يعطيك الصحة باين بلي بنان
كون غير حطيتينا التصاور يزيدونا يشهيونا كثر

__________________________________________________ __________

>>>> الرد الثاني :

بارك الله فيك و شكراااا

__________________________________________________ __________

>>>> الرد الثالث :

المشاركة الأصلية كتبت بواسطة محاربة الصحراء 19
يعطيك الصحة باين بلي بنان
كون غير حطيتينا التصاور يزيدونا يشهيونا كثر

والله ماذا بيا والله ما يتحطولي الصور واله جربت من قبل ما حبوش أسفة حبيبتي انشاء الله اذا لقيت حل نحطهم في خاطرك ههههههه

__________________________________________________ __________

>>>> الرد الرابع :

المشاركة الأصلية كتبت بواسطة sarsora777
والله ماذا بيا والله ما يتحطولي الصور واله جربت من قبل ما حبوش أسفة حبيبتي انشاء الله اذا لقيت حل نحطهم في خاطرك ههههههه

والله صح بنان بزاف

__________________________________________________ __________

>>>> الرد الخامس :

المشاركة الأصلية كتبت بواسطة hanadi193
بارك الله فيك و شكراااا

العفو اختي و شكرًا على مرورك