عنوان الموضوع : البطراف المرقد من مطبخي المطبخ الجزائري
مقدم من طرف منتديات العندليب

مرحبا جميعا
البطراف او الشمندر صراحة لا استغني عنه طيلة الشهر الكريم
قولو لي علاش ؟........باش وجهي يتورد ويحمر ومانرجعش مصفارة في رمضان ههههههههههههه
على هذا شريت كمية من البطراف وقلت نرقدها خير ما نظل كل يوم نطيب ومع السخانة وكيفاش درتلو نخلي الصور تشرحلكم اكثر
اولا قشري البطراف واغسليه

كانت عندي سبع حبات خذيت زو حبات قطعتهم دوائر وقطعتهم بالطابع تاع القاطو للتزيين هكذا اذا جاوك اضياف ولا غير انتي وشبحي سلاطتك بيهم تلقيهم واجدين ومتبلين




وهنا راني درت منو اشكال وقطعت مربعات من البقايا تاع الدوائر اللي قصيتهم وزدت تاني عليهم زوج حبات والباقي قطعتو براج على جال السلاطة المختلطة كما تاع المطاعم يقدموه على شكل شرائح
ونفورهم وتاع الاشكال فورهم وحدهم باش ما يتخلطوش ومن بعد يتكسرو

وهنا بعد ما كملو الفوار وبردو خليهم يبردو في الكسكاس ويقطرو .... وجدت زوج بلارات زجاج وحدة على جال المربعات والشرائح والاخرى على جال اللي قصيتهم بالطوابع تاع القاطو
وصلصة الترقيد اللي هي كاس زيت وفي نفس الكاس نعبرو نص خل ونص ماء وملح نخلطوهم ونفرغوهم في البلارات ونسدو عليهم ونحطوهم في الثلاجة والوقت اللي اتحبي اجبدي وحطي في الطبق راها سلطة واجدة ومتبلة


ملاحظة هاته التتبيلة هي الكلاسكية يعني كل وحدة وكيفاش اتحب اتضيف مثلا فصوص ثوم او معدنوس او واش تحب
وهذا طبق تاع سلطة بطراف بالثوم والمعدنوس

تجبدي بطراف من البلارة حطيه في طبق ابشري فوقه سنة توم وافرمي المعدنوس وخلطي وحطي عليه علبة زبادى طبيعي
هده السلطة بالطريقة المبسطة وهي جد لذيذة ومفيدة ايضا لمرضى الظغط المرتفع
يعني تقدري اتضيفيلها واش حبيتي طماطم مكعبات او فلفل اخضر مكعبات وبصل
لكن انا افضلها هكذا والزبادي يعطيها طعم روعة
واخيرا صح رمضانكم اتومو بالصحة والعافية وربي يعيدو علينا احنا وكل الامة العربية الاسلامية يارب
وماتنسوش كولو البطراف كل يوم باش ماترجعوش مصفارات في رمضان هههههههه


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

يعطيك الصحة اختي على المعلومة انا تاني نموت على البطراف

__________________________________________________ __________

>>>> الرد الثاني :

بلا مزية اختي

__________________________________________________ __________

>>>> الرد الثالث :

Ya3tik saha hayel haka ndiro barak allah fiiiiiiiiik

__________________________________________________ __________

>>>> الرد الرابع :

شكراااااااااا لك
يعطيك الصحة .......

__________________________________________________ __________

>>>> الرد الخامس :

الاخت نسفسيك.....اولا الطريقة هايلة ويعطيك الصحة ....لي لفت انتباهي كي قلتي البيطراف يحمر الوجه ...هاذ المعلومة راكي متاكدة منها ختي ???