عنوان الموضوع : تابع اسئلة واجوبة للخرباااااااااااانات ؟؟؟؟؟الجزء الرابع لبشرة صحية
مقدم من طرف منتديات العندليب

تابع اسئلة واجوبة للخرباااااااااااانات ؟؟؟؟؟الجزء الرابع



سؤال: أن ألآلم الظهر ظهرت في هذاالوقت أي قبل شهرين وآلام مصاحبة قبل الدورة وبعدها واثناء الجماع كما أنني قد عالجت من مشكلة الألتهابات التي عندي ولكنها تنقطع يوم او يومين وبعدها تعاود من جديد وعدم إنتظام الدورة بعد الولادة مباشرة وعندما تاتي تاتي بشكل خفيف جدا فما هو الحل في نظرك أفيديني جزاك الله خير.

على مايبدولي انه عندك ميلان للخلف ممكن اصبح عندك هذا الميلان من تو يعني تذكري الدورة الي قبل ماتحسين بهذي الاعراض يمكن انك شلتي شيء ثقيل فوق طاقتك او سحبتي حاجه ثقيله اثناء الدورة على كل حال ياختي هذا الميلان على مايبدولي للخلف لذلك استعجلي وابحثي عن مرأة تعالج واهم شيء تكون ثقه وتطمني منها افضل وياليت ترجعين شوي لموضوعي عن الميلان وتقرينه عشان تعرفين اخطاره وكذلك عندي ( فقرة) لاتتركين نفسك

سؤال: عن بخور(كبو)اسويه بنفسي يتكون من (خواجوا,مرة،قشربصل،كمون،فلفلة الهوا) ياليت لوتعطيني رايك فيه,,,مع العلم اني بعد ما اتبخر به احس بالم في بطني وظهري ما ادري استمر عليه,,,وبرايك ايش سالفة هالالم؟؟؟

لابأس بالكبو اللي ذكرتي وممكن تضيفين له ( محلب+حلتيته )
هل تتكبين وقت الدوره؟ اذا وقتها فهذا الالم طبيعي لان الارحام تدفى وتنزل الدم الفاسد

سؤال: بعض الأشياء ما سمع عنها العطار وهي قشرقهوه ونونخة وأرطا وكبو الهواء ما أدري اذا تعرفين لهم مسميات ثانية
وذكرتي بعد من أدوية العشرين يوم الأخيره الحبة السمراء فهل هاذي هي نفسها الحبة السودة وبعد بالنسبة للسفوف اشلون ناكله مع شاي الأعشاب نخلطه معاه والا ناكله في البدايه بروحه ونشرب وراه الشاي؟؟؟؟
ويصير نحط مع الشاي شوية سكر أو عسل لتحسين الطعم؟؟؟؟

المشكلة ان قشر القهوه موجود ابحثي عنه في محلات العطارة والتي يعمل بها من الاخوة الحضارم (من اليمن)واكيد بيعرفونه على طول
الحبة السوداء نفس الحبة السمراء
الارطاء نبات صحراوي معمر معروف وهو ممتاز للجروح اتمنى انك تحصلينه ودوري عنه في محلات العطارة اللي يعمل فيها كبار السن من السعوديين .
النونخه تشبه الى حد كبير حبة الحلوة ولاكن لها لذعه شوي وطعمها حالي
اما كبو الهواء مخلط من مجموعه من الاعشاب مثل( خوا جوا + مرة+ كمون +حلتيته+محلب+ [حاجه والله مدري وس اسمه لكن مثل الانابيب المفرغه لونها اسود وحجمها متوسط]+قشر بصل +هدب الاثل) وفيه حبوب ضغيره حمرا يابسه زي الخرز هذي شيليها مهيب زينه.

سؤال: اسمع عن نزول الارحام نسال الله العافيه لنا ولجميع المسلمين لكن مااعرف وشي اعراض

أما نزول الأرحام ما عرف عنه كثير ولكن إلى اعرفه أن الأرحام يتغير موقعها نزول وتكون رخوة وغير قادرة على تحمل الضغط(الحمل) ولذلك اكثر ألي يعنون منه الحوامل واسبابه ما عرفها

سؤال: قشر القهوة فما لقيناه فهل ممكن الأستغناء عنه أو انه ضروري ومهم.

ممكن تستغنين عن قشر القهوة وتضعين مع قهوتك اللي تتقهوينها قرنفل

سؤال: بالنسبة لي فأعاني من الهواء ولكن في فترات متباعدة وشئ بسيط والسوائل كذلك احيانا تزيد خاصة بعد اليوم التالي للجماع مع رائحة واحيانا لا توجد افرازات واود ان اعمل تضييق كما اني اشعر احينا بألم عند الجماع كوخز في نهاية المهبل مع العلم اني ركبت لولب بعدما انجبت طفلي الثاني بثلاث اشهر والأن افكر في ازالته اي بعد عشرة اشهرمن تركيبه ولكن الدورة تأخرت علي خمس ايام مع انها كانت منتظمه وخايفه بصراحة اني اكون حامل فوق اللولب واحيانا اقول يمكن اللولب طاح بدون ما احس وبصراحة اكثر خايفة اروح اكشف

انتي لابد ان تتبعي النظام السابق وقت الحيض كما كتبته
اما الوخز الذب تحسين فيه سوف اشرحه لك هل( عندما يأتيك وانتي واقفه لاتستطيعين الجلوس وكأنه عصا تخترقك)اذا كان مثل الوصف السابق
فانتي داخلك هواء اثناء الحيض او النفاس لذلك بادري بالعلاج بالنسبه للحمل لابد انك تروحين وتشوفين وبعدين اذا انتي حامل لا تتضايقين الحمدلله هذي هدية الرحمن ويالها من هديه من اجمل الهداياقال تعالى(المال والبنون زينة الحياة الدنيا...) سورة الكهف ايه 46.
واذا حامل بشريني لان عندي لك كلام خاص واذا مو حامل ابدأي العلاج

سؤال: بالنسبه للوخز اللي تقصيده هذا كان من زمان يجيني قبل الزواج وبعدين خلاص يعني نادرا ما احس فيه
اما الوخز الذي اشعر به هو وقت الجماع اي بالداخل لا ادري يمكن عند بداية الرحم واحتمال يكون من اللولب ويمكن يكون سبب ثاني ما ادري بصراحة وحتى هذا الالم حسب طريقة الجماع ( اسفه على دقة الشرح )
واذا اتكدت انه ما فيه حمل شو اسوي بالضبط هل اتبع خلطة الحيض اللي ذكرتيها ولازم اتبع النظام الغذائي اللي ذكرتيه او يكفي اني ابتعد عن الممنوعات في تلك الفتره
وبالنسبه للكبسولات استخدمها بعد فترة الحيض وهل هناك مدة محددة يعني شهر مثلا او اسبوع او الامر مفتوح
وشو رايك بالرياضة بصراحة لما اسوي رياضة اشعر بالسوائل تزداد
واخيرا شو هو الرشاد

اتبعي النظام السابق وقت الحيض, والكبسولات استخدميها كل ايام الحيض ولابأس في بعض الايام العاديه يعني مرة واحده في الشهر بالنسبة للرياضة في ايام الدورة تجنبي الرياضة العنيفه ممكن تمشين وتعملين في المنزل الاعمال العاديه.اما بالايام العادية سوي جميع الرياضات الي تحبين
حب الرشاد هو البذور وهي ضغيره ولونها بني ولطعمها لذعه واذا وضعتيها في ماء تصبح لزجة.

سؤال: أبي أسألك عن الحبه السوداء تلهم ( تسف سفوف ) حب بدون طحن ( بودره ) وإلا مطحون؟؟؟ وإذا طحناه تستخدم مباشره بعد الطحن ؟؟ لأن فيه ناس يقولون إذا طحناه وجلست فتره تروح فايدته

فيه عرق الظهر يوضع مع الحلبه ويمنع الريحه ولكن ايضا يقلل من فائدة الحلب وانا انصحك ماتستخدمين عرق الظهر لانه يذهب فائدة الحلب وممكن تقرين جميع الردود وانا كتبت عن الرائحه وايضا ممكن تطحنين(شبه بيضاء +البودرة اللي تحبين)وتستخدميها للابطين
اما الحبه السوداء اذا قصدك مع السفوف نعم تطحن اما مع العسل لا ماتطحن.

سؤال: التمر مع الرشاد ينفع من دون سمن لاني مستحيل آكل السمن,هل ينفع؟

ممكن تستغنين عن السمن بزبده ولكن السمن البلدي افضل بكثير

سؤال: بالنسبة للتحاميل..تصلح للي مركبة لولب،،يعني مافيه خوف ان الملح والعسل يذوب اللولب،،او ان الملح حار على الرحم ممكن يحرقه ؟؟؟؟

ممنوع استخدام التحميلات مع الولب يخربن اللولب

سؤال: بغيت أعرف طريقة التمر مع الرشاد بالضبط أشلون انحط الرشلد على التمر ننقعة أول في ماي وبعدين نحطه عليه وهو ناشف...بينخلط يعني؟؟؟

عمل التمره مع الرشاد كالتالي:
خذي تمر بدون نوى +سمن (المقادير على راحتك) ضعيهم في قدر وعلى نار هادئة لمدة 10 دقائق حتي يذوب التمر قليلا مع شوي تحريك بعدين اضيفي الرشاد وهو حب ناشف وكثري شوي مثل السمسم لا تحطينه بماء.

سؤال: انا ماآكل السمن ولا الزبده ينفع التمر مع الرشاد بدونهم؟سؤالي الثاني اللي تحس نفسها مره خربانه كم المفروض تستمر على البرنامج يعني اربعين يوم تكفي؟

حاولي تغصبي نفسك عليها لان الحريم الاولات يسمونها ربيبة الارحام ومعناه انها ترب الارحام مثل مترب الدلال وتصير تلمع من النظافه واذا ماقدرتي جربي معه زيت الزيتون واذا متحبينه بس اطبخي التمرة واضيفي الرشاد(بس ماضنيت بتنفع كثير) ومثل ماقلت الخراب عشان الوحده يطيب منه ميه بالميه لازم يكون بعد نفاس بس اذا الوحده سوت النظام لمدة اربعين يوم عادي تكون بأذن الله نسبة الشفاء ثمانين بالميه وهذا تقدم ومع الدورات ترجع مثل اول واحلا واهم شي صحتها قبل كل شيء

سؤال: بغيت أسألك عن شي إسمه ( مردود ) موجود عند العطار هل هو زين للنفاس والحيض ؟؟ وياليت أخت فيافي تعطينا إذا فيه برنامج تتبعه الحامل في فترة الحمل وبغيت بعد الأشياء اللي تساعد على الولاده. شاهي الأعشاب اللي ذكرتيه للنفاس والحيض هل هو يطحن أو يترك حب ؟؟ وهل يغلى أو ينقع حتى لا تذهب فائدته والنقع يكون بماء مغلي أو ماء فاتر؟؟ ماهو مقدار الشب والبودره اللي ذكرتيه لي يروح ريحة الحلب ؟؟

انا ماأنصحك تشرين دواء ماتعرفينه لان العطرين يبيعون بعض النباتات اللي تسبب الخراب مثال:
الصك والك معروف يخرب وشكله زي الكلوه لونه بني واملس هذا ياساتر منه يسبب الخراب بشكل مرعب. وصدقيني الادوية اللي كتبت عبارة عن مردود وهي ممتازة .
اما شاي الاعشاب مايطحن تغلينه على شكله لمدة عشر دقايق وتحلينه اما بسكر نبات او عسل طبيعي .
الشبة خذي الحجم (كبر حبة المشمش) واطحنيها واضيفي عليها تقريباَ 12 م.ك من البودره المفضله عندك وهذي للاستخدام اليومي ماراح تضر اذا كل يوم الصباح غسلتي منطقة الابط ووضعتيها وهكذا

سؤال: حبيت أسألك عن المكروشه وكيف طريقة استخدامها؟

المكروشة ممتازة جدا بس تبي الحذر والتعامل الجيد مع البخار عشان متسبب حروق:
خذي كرش ذبيحة غنم لاتكون مقطعه يعني على شكله غسليهاونظفيها وبعدين احشيها بأدويه مثل:
كمون +فلفل اسود+حبة حلوه+دارسين(قرفه)+حلبه +محلب+نونخه ماش+قيصوم+شيح+يانسون+ميرميه+حزاة+الحبة السوداء+قرنفل) وبعدين تخيطينها وتحطينها في قدر كاتم لمدة ساعه بعدين تسكرين النار ولاتفتحين القدر خلي لهواء ينسم مع الفتحه المخصصه بعدين بربع ساعه خذي القدر معك داخل بطانيه وافتحيه شوي شوي واستنشقي البخار واذا تقدرين تاكلين منها يكون احسن وبعدين اجلسي لك شوي انتي ومتلحفه بالبطانيه وخلي احد يروح ويوزنلك الدش على ماء دافي وقومي وانت والبطانيه وادخلي تحت الدش وتروشي ,والهدف انك ماتطلعين من تحت البطانيه عشان ماتتعرضين لتيارات الهواء المختلفه ويكون الماء اللي تتروشين تحته دافي .وكذا تمت العمليه كامله .
سؤال: عن كبو الهوى فانا اشتريتة بشكل يشبة المزمار اي مجوف ولونة اسود واختي اشترتة يشبة هيك الفلفل الاسود ولاعرف ايهم هو كبو الهوا فارجو منك التوضيح ان امكن
كبو اللهواء مكون من كل الاعشاب اللي ذكرت سابقا واللي زي المزمار يسمى عود الهواء(اسمه توي اعرفه من امي) والي اختك حصلت عليه هذا اسمه فلفل الهواء وها العنصرين اخلطيهم مع بعض راح اعطيك بعض من مكونات كبو الهواء(محلب+ورق حناء+فلفل هواء+ عود هواء+ مرة + حلتيته+خوا جوا+قشر بصل+كمون+هدب اثل).
سؤال: انا الان في خامس يوم الدوره واستخدمت التحاميل والبخور عادي اتبخر ثم احط التحميله والتحميله ما نشفت عندي دخلتها وهي رطبه اشوي عادي
ابي منك لو سمحتي وش احط اخر يوم دوره علشان المنطقه تضوق
الالم الي معي وقت الجماع شديد جدا كان ارحامي بتنفجر حتي نفسي يضيق منها
ورحت لدكتوره من ثلاث اشهر واكشفت من تحت وقالت الارحام سليمه وارجعت لوضعها الطبيعي علشاني انا مرضع فانا علشان حاسه في الهواء توقعت هو الي يضغط علي ارحامي ما توقعت ميلان ابد لكن هل تتوقعين انهم ما عندهم سالفه وارحامي علي قولك ما يله اذا كذا لزم اجي السعوديه واعالج لان الالم حار وهل عندك طريقه لهذا الشي وش اسوي

حبيبتي خروج الهواء هذا خراب وما يسبب الم ابد ابد لكن الميلان والالتهابت هي اللي تسبب الالم وانتي تقولين انك كشفتي ويقولون لك مافيه شيء وانا اسألك لو كان كل شيء تمام ماكنتي حسيتي بالألم ولاطلع من هواء صح؟ عشان كذا اقولك شكلك معك ميلان ويمكن للخلف واذا تقدرين تجين هند اهلك بالاجازة لاتخلين نفسك روحي لمرأة متخصصه بعلاج طب العرب وياليت تكون هذه المرأه من نجد لانهم جدا شاطرات.
اما علاج الميلان فلايعالجه اعشاب الذي يعالجه (المخبنة والتدليك)وهذا يسونه الحريم وياسبحان اللي عطاهم المعرفه .
تخيلي بنت عمتي عندها ميلان ومحد اكتشف هذا الميلان وكانت دايم تشكي من الالم وقلنا لها اكيد ميلان وراحت لمرأة وعالجتها والحمدلله الحين تعدل الرحم والحين هي حامل ويكون بعلمك أي واحده عندها ميلان يأما متحمل ااو اذا حملت مايثبت لازم تأخذ مثبت والعلاج مرة في الشهر حتى يتعدل بعض الحريم من اول شهر وتطيب وبعضهن يبيلها 3 شهور.

سؤال: هل الفلفل مع العسل في اخر ايام الدورة زين للمرة حيث سمعت من الصديقات انه يحرحر!! وهل المحلب ينزل المويات؟

الفلفل الاسود ممتاز مع الشوربات والايدامات والمرقوق والمطازيز والعسل ايضاممتاز لكن معمري انا خلطتهم مع بعض
والمحلب ينشف وينزل المويات بس مايستخدم إلا في اخر ايام الدورة او 20 يوم الاخيرة من النفاس

سؤال: في الدوره الي فاتت قريت لوحده تقول السكر النبات بعد الدوره زين والله جربته علي طول والله لا يوريك احس انه خربني ازياده والالم هل تتوقعين انه من اللتهبات ولا التهبات تجي مع الميلان

حنا في حالات الكسور والجروح الصعبه نمنع المصاب من اكل السكر لانه مايساعد على التأم الجرح او الكسر
وننصح بالعسل الطبيعي لانه يساعد على تكون الانسجة التالفة. عشان كذا قليل مانستخدم السكر في النفاس او الحيض ونلجأ الى العسل الطبيعي .

سؤال: هل شرب منقوعة العنزروت في ايام الدورة ضارة لاني سمعت من بعض الاخوات انها ترخي..!!
للفائدة لقد استعملت الشبة وياليتني ما استعملتها الله اعلم وش صار لكني ادركت نفسي وانقذتها
من هلاك كاد ان يبطش بها (مويات ما توصف ) المرة بعد عناية الله هي الحل الوحيد .. انصح الجميع بها" لاتذكريها لعدوك " غاليتي وش رأيك بالغسول المذكور"جرجبيت ريسيب" انة يطهر ويضيق

لا منقوع العنزروت ان شاء الله مايضر لانه منظف للمعده والامعاء ولا يضر ابدا لكن يكون مكون من(عنزروت+مرة+شوي محلب) ويشرب يومياَ
اما الشبه فهي مخربة جدا جدا بعض النساء تستخدمه لجهلها كتحميلات او كغسول لمنطقة المهبل وهي لاتعلم ان اثره شديد وتسبب التهابات وتخرب اما اغسول اللي ذكرتيه ما أعرفه .

سؤال: إذا ( لاقدر الله ) وكانت الولاده قيصريه هل أستعمل كل هذه الأشياء الكبو ، شاي الأعشاب ، التحاميل ، الغسول ... وإلا خلاص أريح عمري مالها فايده ؟؟؟؟

انا جبت بعملية ومشيت على النظام لان الارحام هي الاساس والخراب يكون بالارحام مو بالمهبل.
بالنسبه لشاي الهواء زي ما قلتلك مافيه شاي هواء لكن ممكن المقصود المطبوخة وفيها مجموعة من الاعساب فيه حاجه يابسه زي ورق البازلا وخشب زي الاغصان وحب صغير احمر هذي تنظف من الدم ولكن فيها اعشاب لابد تتخلصين منها لانها اذا انقطعت عنك تخربين ولذلك اعطيتك شاي اعشاب حتى لو ماتوفر ماتخربين اذا تركتيه وانا استخدمه وخواتي وخالاتي وكلنا ولله الحمد تمام

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

مشكوررررررررررررررره

__________________________________________________ __________

>>>> الرد الثاني :

يعطيكي العافيه يارب

__________________________________________________ __________

>>>> الرد الثالث :

مشكوره
الله يعطيك العافيه

__________________________________________________ __________

>>>> الرد الرابع :

مشكوووووووووووووووووووره

__________________________________________________ __________

>>>> الرد الخامس :

ماشالله عليج مشكووووووورة