عنوان الموضوع : حبيبتي تعالي اقولك كيف تقسمين مهرك للعروس
مقدم من طرف منتديات العندليب

حبيبتي تعالي اقولك كيف تقسمين مهرك



اهلين بالعروس
اكيد كل وحدة شايلة هم كيف توزع مهرها
انا قرات موضوع في هذا المجال وحبيت انقله لكم
مع كل الشكر والتقدير لكاتبة الموضوع

رح ناخذ أدنى حد للمهر وهو 30 ألف ..
ونشوف كيف رح نقسمه ..بدون أي زيادة من الأهل ..

وانا لما كنت اجهز كنت حاطة ظروف كل ظرف فيه مبلغ ومكتوب عليه لايش ..
عشان اعرف كم مسموح لي اصرف ..

أولا رح نقسمه 3 أقسام كل قسم 10 آلاف ..







~*~










1 / الذهب = 10 آلاف


اللي مهرها قليل مرح تقدر تخلي مبلغ كبير للذهب ..وكمية الذهب تتحدد حسب أهميته عندكم ..
طبعا بيكون عندك طقم الشبكة وطقم الصباحة من زوجك ورح تحصلين هدايا ذهب من المقربين منك ..
ولا تنسين تشترين لك ساعة وحدة ع الاقل تكون غالية ..
وفيه فكرة لطيفة ..انا شخصيا سويتها وفادتني في مسألة الذهب ..
كان عندي شوية ذهبات قديمة لما كنت بنت ..بعتها وجابت لي مبلغ حليو باعتبار ان الذهب غلا
وزدت المبلغ وشريت به ذهب جديد ..







2 / ليلة العرس = 10 آلاف


1000 للكوافيرا
طبعا هذا هو السعر المنتشر عند أغلب المشاغل خاصة اللي في الهفوف ..
لكن فيه مشاغل توصل 1200 وفيه ب 700 هذي البيوت و850 - 900 هذي مشاغل المبرز


3000 للتصوير

1000 ريال تكون للفيديو
2016 ريال للفوتو
وأعتقد المبلغ حلووو لانه الصور والفيديو هي الشي الوحيد اللي رح يبقى لك من العرس
وتقدرين تورينه صديقاتك اللي ما حضروا عرسك..

500 للمسكة

نفس الشي فيه أغلى وفيه أقل حسب المحل وحسب كمية الورد


500 للزفة

طبعا هذا الجزء احس فيه تفاوت كبير في الاسعار من محل لمحل ..فيه زفات مرة غالية ..
وعلى فكرة تقدرين تستغنين عن هالجزء لو انتي او اي حد تعرفينه سوا لك الزفة ..


500 للحنا

المتعارف من 350 الى 500 ...وفيه حتى ب 250 للعرايس


1000 للمشغل
تشمل حف الشعر وتنظيف البشرة ولو حابة تقصين شعرك او تصبغينه
طبعا الصبغ وتنظيف البشرة لازم تروحين قبل العرس باسبوع
تقدرين تستغنين عن حف الشعر وتنظيف البشرة وتسوينها في البيت لو حابة ..


2500 للفستان

طبعا الفستان يختلف اذا بتفصلين او تاجرين ...التفصال يبي له ميزانية اضافية ..
بس الاجار يبتدي من 2500 عند المحلات ..
بس لو بتاجرين فستان مميز من عند وحدة مفصلة فستانها او من عند مصممة رح يوصل 5000



لفستان الصباحة 1000
هذي فساتين السهرات يعني حق الصباحة عاد على حسب عاداتكم ..
البعض تفصل اكثر من واحد ..
والبعض عندهم ما تفصل ابدا بس للصباحة تاجر وانتهى الموضوع

احنا عندنا اهل الزوج يجيبون قماشتين والبنت تفصلها
وبعضهم يجيبون واحد جاهز والثاني قماش يعني يختلف ..
وانا اقول لو ما جابوا لك اجري للصباحة وفكي عمرك من التفصال والحوسة ..


3 / الحاجيات الأخرى = 10 آلاف






1500 للعطورات

ما له داعي تكثرين عطور لانه اكثر الهدايا اللي من البعاد رح تكون عطور
واخذي لك مجموعة من اي محل تفضلينه نكتار ، زهور الريف ، بودي شوب ..
بس انصحك تختارين القطع اللي تبينها بدال ما تشترين المجموعة كاملة ..



500 للمكياج
ما له داعي تكثرين اخذي الشغلات الاساسية والالوان الاساسية من كل شي
وبعدين لو حبيتي تغيرين في الالوان تقدرين تشترين
وعلى فكرة المكياج الكامل مرح تحطينه الا في الطلعات والعزايم
لان في البيت اغلب الرجال يحبون الميك الناااعم مجرد كحل وبلاش وروج
طبعا المكياج يشمل :
كريم اساس ، بودرة ، شدو ، ارواج ، بلاش ، غلوس ، مناكير ، كحل سايل ، كحل عادي ، مسكرا ،
لمعة ، غليتر ، شنطة مكياج صغيرة للطلعات ، مراية صغيرة ...مدري لو نسيت شي ..


للعناية 1500
تشمل اغراض العناية الخاصة فيك ..
شامبو ، كريمات ، امشاط ، عدة المنيكير ، حمام زيت ...الخ
واستشوار وآلة حلاقة ..



للشنط والجزم 1000
..حاولي تاخذين الالوان الاساسية عشان تتماشى مع اكثر من لبسة

للاكسسوارات 500

لا تنسين الاحزمة ومسكات الشعر تدخل ضمن الاكسسوارات



للاندروير والبيجامات 1000
طبعا اخذي على قد حاجتك ..واخذي من اللي يجي طقم

واللي يجي قطع مفصولة ..

وبالنسبة للبيجامات ولبس البيت انا ما شريت الا اثنين بس

لانه بصراحة ما احب البسهم

وفوطة او اذا حابة تاخذين روب الاستحمام


للانجري 1000

عاد هذا هوس العرايس هههه
وحاولي تنوعين في الالوان والموديلات عشان ما تملين منهم بسرعة ..


للملابس 2016
طبعا ملابس الطلعات شي مهم جدا ..
كثري من الفساتين النعومة القصيرة والتنانير القصيرة

وبنطلونات لا تكثرين يكفي جينز واسود وابيض
لان احسها ما تنلبس كثر الشغلات الثانية ..
واخذي كم برمودا ..واكيد كثري بلايز

وحاولي اثناء التسوق انك ما تشترين بعشوائية

يعني حاولي تفكرين شو رح تطقمين مع القطعة قبل لا تشترينها وتتوهقين فيها ..
واذا تقدرين تزيدين المبلغ زيديه لان ملابس الطلعات عادة تاخذينها من المحلات والماركات الغالية ..
وهي اللي رح يشوفونها الناس اذا طلعتي ..



للعبايات 1000
خذي لك عباتين وشيلتين ونقاب
احنا عندنا اهل العريس يجيبون لك عباة وشيلة مع المهر ..



~*~



طبعا الشغلات المتعلقة بالصالة مثل كوشة وكذا
هذي على اهل العريس يعني ارتاحي ههه
ولو تلاحظون يوجد اختلاف في الاسعار من منطقة لمنطقة في المملكة ..
بالذات في الفستان والكوافيرا والتصوير ..
فكل وحدة ترتب مهرها حسب الاسعار اللي عندهم .. [/COLOR]

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

مساء الخير طبشوره
مشكوره ع الموضوع الحلو
بس احس المبالغ مرررررره مبالغ فيها
مع ذلك احلىىىىىىىىىىى تقييم

__________________________________________________ __________

>>>> الرد الثاني :

يسعدلي مرورك جوجو
هذي صورة تقريبية للتقسيم وطبعا لا بد من بعض التغييرات

__________________________________________________ __________

>>>> الرد الثالث :

يسلموووو خيتوووو بس احس كانو شويه التوزيع يعني الف للملابس البيت وزي كذا يعني الاسعاار دحين نااااار
انا مشاءالله لاقوة الا بالله مهري 50 ومحتاسه واحس مايكفي والا الان مو عارفه اقسمه الله يعين بس

__________________________________________________ __________

>>>> الرد الرابع :

والله صادقة بس هذا مجرد توزيع ولابد من التغيير
نورتي ياعسل

__________________________________________________ __________

>>>> الرد الخامس :

مشكورة
ويعطيك العافية