عنوان الموضوع : تطبيقي للاسبوع الثاني من دورة الرقي بمدبرة منزل مثالية تجاربي
مقدم من طرف منتديات العندليب

السلام عليكم و رحمة الله و بركاته

الحمد لله بعد قضاء يوم السبت مع زوجي لاول مرة من نهار زوجنا حسيت بطاقة اجابية و نفسية عالية بعد ماكانت شوية مش مليحة بسبب انتظاري للحمل كل شهر الحمد لله على كل حال ربي يهدينا برك


تطبيقي ليوم الاحد

صباحا نضت بكري صليت ووجدت نفسي للعمل باه ندي اوراق للادارة ديتهم و كي رجعت لداري عملت التنظيف و الترتيب اليومي حطيت ماسك من العسل الطبيعي و قريت اذكار الصباح حطيت الفلاش ديسك فالتلفاز و شغلت سورة البقرة و بديت



غسلت القش ووجدت الغذاء ووليت غسلت الاواني تع الغذاءصليت الضحى و و من بعد صليت الظهر مع قراءة 4 صفحات من القران و خرجت المأكولات من الثلاجة و غسلتها و ذوبت لاقلاص لي دارلي من فوق بصح غير شوية و غسلتها و فتحتلها الطاقة تع الكوزينة و خليتها


تشيح جيت قعدت شوية فالنت كي وصل العصر صليت و قريت القران ووليت رجعت المأكولات للثلاجة و دخل زوجي بالقضيان فرغت الخضروات و الفواكه غسلتها و خليتها تقطر و من بعد الى الثلاجة و في نفس الوقت وجدت العشاء سكالوب محشي مع شوية فريث و عجنت الكسرة و طيبتها حطيتو يطيب لقيت العين جات وليت زدت غسلت شوية قش ونظفت الحمام و التواليت



حشاكم تطبيق تع السبت لاني كنت غايبة و في يدي بعد غسلت الطاقة و الباب تع الكوزينة و البالكون تع الكوزينة و الحيط لي تحت الطاقة و غسلت الارضية تع الكوزينة بالعملاق و جافيل سيدهم و هذا تطبيق يوم الاثنين درتو بالاحد تاني لاني بالاثنين علبالي نكون مشغولة


تعشينا و لميت الماعن تع العشاء غسلتهم دخلت اخذت دش وصليت العشاء مع قراءة الورد اليومي و سورة الملك


تعشينا ووليت لميت الماعن

التطبيق الجمال عادة تفريش الاسنان مع ترطيب و الماسك تع الصباح



>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

يوم الاثنين

نضت على الساعة 6و نصف صباحا صليت و ووجدت نفسي للعمل كي وصلت للخدمة لقيت لي نخدم معاها توفى الوالد تاعها عاودت رجعت للدار دوشت و هزيت الفراش و و على 10 رحت عند عجوزتي باه نخدمو الشخشوة ( تحضيرات العيد)

الشخشوخة خلصناها على الساعة 16 عيطت لزوجي اخذني عند زميلتي عزيتها في باباها و رجعت لقيت ديجا عجوزتي نصبت العشاء عاونتها فالسلاطة تعشينا و غسلت الماعن و روحت لداري فالليل

تطبيق الجانب التنظيفي درتو البارح الاحد


__________________________________________________ __________

>>>> الرد الثاني :

يوم الثلاثاء

مادرتش التطبيق التنظيفي و اكتفيت بالتنظيف و الترتيب اليومي المعتاد و ع طي الملابس حبيت نرتح من الشخشوخة لي درنا بالاثنين رحت خدمت بالعشية

التطبيق الجمالي نزع الشعر من الجسم دش ترطيب فرش الاسنان

التطبيق الديني الصلاة + صلاة الضحى + الورد اليومي اذكار الصباح و المساء الاستغفار و الصلاة على حبيبنا محمد


__________________________________________________ __________

>>>> الرد الثالث :

يوم الاربعاء

الجانب التنظيفي

خليت التطبيق تع يوم الثلاثاء جمعتو مع تع الاربعاء لاني ماخدمتش اليوم بديت هزيت الفراش و رتبت الغرف شغلت التلفاز على سورة البقرة درت الكوشة بفورس اكسبراس

( القرعة الكبيرة البرتقالية ) من كل الجوانب و حتى الكوانن و الحيوط لي دايرين بيها و خليتهم ياه يدير مفعولو

و اتجهت للخزانة لي فالكوزينة فرغتها و نظفتها و عاودت رجعتهم فيها و رجعت للكويزينيار حكيتها على الخفيف خلاص لانها مش متسخة بزاف و ايضا

هذا المنتج ينحي عليك التعب خلاص ماعليك غير تمسحي برك غسلت الحيوط و شللتهم عومت الكوزينة بالماء هههههه

و غسلت التيو تع الغاز تع الكويزينيار و تع الطابونة شللتهم وغسلت الكوانن بالحكاك تع الطولي رجعو يشعلو

سيقت الكوزينة و باقي الغرف بساني ثوب تع الخزامة امممممممم ريحة هايلة و حطيت درت الغذاء سباقيتي لزوجي و انا قليت ليا شوية فلفل حار مع بطاطا لاني مانحبش السباقيتي


فالقيلولة دخل للانترنت هدرت مع دارنا و شوية فالمنتدى هبلني هذه الايام و نضت بعدما صليت العصر درت الكسرة ووجدت العشاء غراتان بطاطا بالجاج و الفرماج و سلطة و فاكية

ووجدت حوايجي تع الخدمة غذوا ان شاء الله


الجانب الجمالي


درت قوماج لوجهي بالتلوة تع القهوة ووضع الفازلين فالرجلين فالعشية خلصت من الكسرة و العشاء توضيت و لبست و حطيت مكياج و قريت شوية قران حتى جا زوجي

الجانب الديني

الصلاة + صلاة الضحى + اذكار الصباح+ اذكار المساء الصلاة على النبي و الاستغفار + الورد اليومي


__________________________________________________ __________

>>>> الرد الرابع :

يوم الخميس

رحت نخدم على صباحا و خلصت و رجعت للدار على 11 و نصف خملت الدار و غسلت القش و حضرت غذا خفيف في انتظار زوجي

بعد صلاة الظهر شغلت التلفاز على سورة البقرة

قعدت شوية فالميكرو و نضت نظفت جميع الاواني و حامل الاواني و الملاعق و علب البهارات

وجهزت العشاء ووجد روحي مع مكياج خفيف

الجانب الجمالي تفريش الاسنان ترطيب لليدين مع اخد دش
الجانب الديني الصلاة الاذكار نسيت تع المساء قريت غير تع الصباح مع قراءة الورد اليومي



__________________________________________________ __________

>>>> الرد الخامس :

يوم الجمعة

التطبيق التنظيفي
بعد الفطور شغلت سورة البقرة و خملت الدنيا و حطيت
غسلت شوية قش و نحيت الغلافات تع المخاد و غسلتهم جاو والديا عندي كي روحو حطيت درت بيتزا للغذاء
فالقايلة دخلت للنت و حضرت درس الاسبوع المقبل
و حضرت العشاء لازانيا و بعثت منها لعجوزتي
الجانب الجمالي

ترطيب و تنظيف الاسنان اخد دش مع وضع زيت للشعر

الجانب الديني

الصلاة + اذكار الصباح و المساء + قراءة الورد اليومي + قراة سورة الكهف