عنوان الموضوع : إحنا عباد وإلا معيز قضايا اجتماعية
مقدم من طرف منتديات العندليب

السلام عليكم ورحمة الله تعالى وبركاته كيف حال الجميع جمعة مباركة
يا جماعة الخير حبيت نتناقشو في موضوع الحافلات او النقل الجماعي ربما لاحظتو عندما نركبو الحافلات السائق اللي من المفروض ما يحكيش وهو يسوق يحكي مع اللي راكب قدامو او مع الروسوفور وينفعل ويعبر والمقود في يدو ومعاه أرواح ناس مسؤول عليها قدام ربي والادهى إحنا ما نحكوش على حقنا يدوبلي ويفوت صاحبو على جال يرفد الناس من الطريق وإحنا ما نحكوش
زيد في كل موقف يدير ساعة والناس اللي راكبة معاه خدامة ومسؤولة عن كل دقيقة اللي ممكن بسببها يتحاوز من الخدمة وإحنا ما نحكوش ومرات لاحظت نكون واقفة وتحبس الحافلة بلاما نحبسها يشوفو فينا 10 دينار أو 20 دينار
المشكل فينا وعلاه ما نحكوش على حقنا واللي تقلق أنا مرة حدث معي موقف كنت مكسورة وبالجبس تخيلو رجلي كاملة بالجبس الله غالب ما قدرتش تحكم طاكسي حتى للدار الظروف ماكانتش تسمح والسبيطار بعيد على المنزل نتاعي يعني الطاكسي غالي سالت الروسوفور وقالي نحبس فالموقف الامر قانوني لازمو يدخل للموقف تخيلو لما وصل لواحد لاري وبعيد بزاف على الموقف شاف الغاشي قرر يعاود يدور لثم وقالنا كنا إنزلو روحو مع صاحبي الكل نزلو كالخرفان وأنا حصلت قتلو ما ننزلش فالبداية قتلي نحطو فالموقف قالي تنزلي قتلوا ما ننزلش وروح نروحو لقسم الشرطة ههههههههههه خلعتو والله نزلني فالموقف وبقيمتي ههههههههه
علاه ما نحكوش على حقنا اللي حدث معاه موقف يحكينا خاصة اللي خدامين شكرا وعذرا طولت عليكم
ملاحظة
يا جماعة شمرا على كل رد بغد ما قريت الردود كاين اخت زعفت مني على العنوان أنا ما قصدتش نشبه الإنسان بالحيوان أنا قصدت إنو إحنا عباد كل واحد مسؤول على افعالو وصاحب الحافلة والروسوفور يتحكمو فينا الحافلة إحنا مخلصين حق توصيلنا يعني بدراهمنا علاه إركبو نركبو إنزلو ننزلو المعيز اللي عندهم راعي يمشي فيهم إحنا عباد بشر لازم نهدرو على حقنا أتقدم بالإعتذار من الاخت والله لم يكن قصدي شكرا


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

السلام عليكم جمعة مباركة لكي وللعائلة
شكرا لكي على الموضوع نعم عندك الحق اختي خصوصا عندما تكون الاماكن ممتلئة ويبدا الريسفور يشارجي ويشارجي في الوسط ويبدا الاكتظاظ حتان متقدرش تتنفس هذا الشي نجده غير في العاصمة

__________________________________________________ __________

>>>> الرد الثاني :

لا لا يا اخي مش غير في العاصمة.ارواح ل قسنطينة تشوف العجب في النقل الحضري.ما خصهمش غير يركبو فوق البلافون.مي الغلطة مش غير ف مول البيس.و لكن تاني في هدا الشعب الي يقبل يركب فوق بعضاه كيما العلبة تاع السردين.انا خطرة ضاقت روحي هبطت و كملت على رجلية
تخيلو السخانة في الصيف و الضيق
يعطيك الصحة اختي على الموضوع الهادف

__________________________________________________ __________

>>>> الرد الثالث :

السلام عليكم
ههههههههه
و الله صح انا دي فوا نمشي على رجليا احسن من روائح و ماركات عالمية تفوح عدا عن الادب و التربية فالحافلات العمومية

__________________________________________________ __________

>>>> الرد الرابع :

وعليكم السلام ورحمة الله وبركاته
جمعة مباركة أختي
عندك الحق في موضوع الحافلات لكن ميش غير من جهة الحصر والضيق
الاختلاط يا أختي متلقي وين توقفي وتخافي لا تقيسي كاش راجل
مع أني نادرا ما نركب فيه وقت يكون الغاشي نخير أوقات خرجة ينقص الغاشي باش نربح راحتي
مرة ركبنا وواحد الراجل نطق يدافع على الحصر قالو اللي يسوق معجبكش هز طاكسي واش جابك للحصر
وثاني مرة شايب مات بسكتة قلبية وسط الحافلة خاصة كبار السن والله يعانيو بزاف والطاكسي غالية عليهم
الله يصلح الأحوال

__________________________________________________ __________

>>>> الرد الخامس :

ضحكني العنوان **عباد و لا معيز **
صح جشع أصحاب النقل كل شخص يشوفوه دراهم ( بلاصة )و قلة المواصلات و قلة الحياء و الاكتضاض مرات و مرات ادي و لا خلي =معادلة صعبة الحل
ربي يكون في العون
شكرا أختي مريلينا و ربي يبارك فيك
ســــــــــــــــــــــــــلام