عنوان الموضوع : محتاجة لدعواتكم و رأيكم تم الحل
مقدم من طرف منتديات العندليب

السلام عليكم ورحمة الله و بركاته
لست أدري من أين أبدأ
قبل زواجي تقدم إليا شخص لخطبتي كان في نظري انسان متدين فيه خوف ربي متعلم ، مربي أجيال أخبرني أنه يبحث عن زوجة عاملة فقط باش تربيلو ولادو و يكونو مثقفين و هو كزوج بسيف عليه يصرف على زوجتو من أكل و شرب و لباس هكاك يقول الشرع كنت حاسة أني صبرت ونلت قالي دراهمك انت حرة فيهم و كل شهر نعطيك مكتوب باش دسيهلي لمستقبل أولادنا،كان شرطي بيت مستقل وكنت باغية نحطو فالشرط لكن قالي متزيريش عليا نوعدك صبري معايا 6 أشهر و نستقلو في بيت لوحدنا و يلا جيتي ومعجبكش الحال نخرجو نكرو قلت الحمد لله شتاراني باغية كثر من هاك
تزوجا في فترة قصيرة بابا يسر له زواجنا المهم كان همه بنتو تتهنا
تزوجنا بعد فترة قصيرة شهر من زواجنا اكتشفت انو جد متعصب لدرجة ميتصورهاش العقل كنت نخاف منو يلا كاش ما يديرلي لأنوم كنتش نحكي لدارنا على حياتي كلش كنت داساتو في قلبي ،كانت ومازالت عجوزتي تتدخل فالكبيرة و الصغيرة و بعد فترة كتشفت كلش يحكيل لأمو مثلا نتفاهمو على حاجة يقولي أوكي يطلع لدارهم يقولي خلاص بطلت مشي كيما هكاك ، نقول معليش
عجوزتي كانت حتى الدوش تحكم فيه كون تدخل عليا بدون سابق انذار تدمر الباب و تدخل ، مرة في الشتاء صابتني غادي ندخل للدوش قالتلي شتا غادي ديري قلتلها يما غادي ندوش قالتلي خفي غلقي سبالة الماء مكانش أقصد السيتيرنا قلتلها يما راني مشمخة و بردانة قالتلي خفي ومتبطايش على فكرة انا نسكن تحتهم في لاكاف باش نخرج لازم نفوت عليهم ، تخيلو مين كان يخرج ولدها تجي دير كونترول ومرات صباح كنت نلعبها راقدة مين منغدمش صباح توقف عند راسي شعال ومبعد طفيلي فرن التسخين نحس الرعادة حكمتني في الشتا القارص ، و بلا شافتني شاعلة الميكرو تقولي هذا علاه شعلاتو طفيه نقولها اما راني نخدم في صوالحي كرهت حياتي لحد الأن مخبرتش زوجي لأنو أصلا ميعدلش ، المهم بعد زواجي اكتشفت أنو زوجي مكانش عندو مليم يعني كلش كريدي في كريدي حتى قاطو زواج لي داروهلو خواتاتو خلصهم فيه كل مرة و حجة مرة يقولي امي تسالني مرة يقولي بابا يسالني تاع دفوع قلت معليش الحمد لله راني خدامة و رباونا والدينا على أنو المرأة لازم توقف مع زوجها لكن اكتشفت أنهم يستغلوه كبير و صغير مثلا مين يكون عندها ملومة تجي تقولو غادي نروح لفلانة أعطي يعطيها من دراهم المصروف و يلا مكانش عندو يحرجني قدامها و يلا كاش معنك اعطي لما كنت نمدلها نقول المهم يهنوني في راسي و على فكرة شيخي يخلص دراهم فرانسة و دراهم اهنا و هما ملي عرفتهم يعيطو لزمان تقول بصح ، كنت مريضة و كنت باغية حاجات تاع الأكل نقول ويلا بغيت ربي راني باغية ديك الحاجة مثلا يطير في وجهي مين نجيبلك راكي عارفة بلي راني امعمر دين كنت انتقلت من ولاية لولاية و الخلصة كانت مبلوكيالي مرات كنت نعيط لدارنا يشروهالي و مرات يطيبولي شتا راني باغية ويسيبوهالي في طاكسي و هو غير باش يخرج و يجيبها من عند الطاكسيور يبهدليني كيفاش تخرجيني دورك بصح كون يجي كاش حد من فميلتو حتى يلا مكانش عندو يقولو سمحلي معنديش بصح روح سلف ومبعد مين نخلص نرجعهالك
الأن عندي طفلين تخيلو ملي زادو مشرالهمش حاشاكم جوارب من غير ليكوش و حليب يلا كانت طالعتلو حتى في أعياد ميلادهم ميكبرهمش حتى بلعبة تاع عشرة ألاف مثلا تقول قاع مشي ولادو ، المناقشة معاه مستحيلة ميخلينيش كامل نهدر يليق نشوف بعينيا و نسكت
بعدما خلص كامل الديون لي كان عليه مرة جانا رابال مكناش نقارعولو قالي ديري في بالك بلي هادو ندسهم عند اما كون يموت بابا معنديش باش ندفنو قلتلو باباك سبق دبر راسك تفوت ليام و يقرر باش يبني فوق سكنتهم يقولي غادي نوسع لما و خواتاتي ، و كأنو معندوش أولاد و مسؤول عن عائلة و احنا عايشين في دار مفيهاش حتى نافذة للتهوية
أصبح الأن الدورو لي صوره يعطيه للماصوات تخيلو في هذا رمضان مد شهريتو للخدامة بلا ميخمم علينا و مين نقولو ولادك خصهم الخبز يقولي انت تعرفي غير جيب جيب مين نجيبلك انا ، عندو عقليا تاع هاك جيب ، مرة ضربني لأنو مبغيتش نسلفلو دراهم ، مصتش الحل نصرف على داري مغرف تالية ميشريهاش لدارو عمرو ملي تزوجنا كبرني بهدية اولادو سامح فيهم وزيد كون يصيب دورو لي بقالي نعطيهولو .
كرهت حياتي ، لدرجة فكرت في الطلاق مرات عديدة
أرجوكم محتاجة لأرائكم


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

قوليلو رايحة نبطل الخدمة و شوفي واش يقولك يمووووت يمووووووووووت ................ مادخلو في دراهمك ...
وزاد انتي حليلتيلو العين يمد في دراهمك لدارهم .........اسمحيلي انتي نية ولقاك عاقلة هو ودارهم كلاو على راسك البصلة

المفروض لي يجيك على جال انك خدامة معناها مايسواش سنتيم .............
كلاني قلبي .......... مانيش حابة نزيد نهدر راح نجرحك
الله يديه او يهديه

__________________________________________________ __________

>>>> الرد الثاني :

بصراحة قرات قصتك وهي لا تحتاج للنصيحة من أحد

أنت في ظرف تعرفينه انت وحدك وتقدرينه

أصبري وإذا لم تستطيعي

فأنت حرة في طلب الطلاق

ولكن كل شيء ستتحميلنه أنت في الأخير بالتوفيق

__________________________________________________ __________

>>>> الرد الثالث :

السلام عليكم ورحمة الله

المشكل فيكم في زوج ،المرأة اذا كانت عاملة

وتقدملها واحد من البداية يتفاهمو ،ع الشهرية أحسن

وزيد كون جا راجل مايطمعش في مرتو

وثانيا والمرأة ثاني مديرش قصة للدراهم والمصاريف

والله أحسن حل نقترحو عليك

اذا عاد خدام حبسي الخدمة هو لي واجب فيه يصرف عليك

وخليه تم يعرف معنى المسؤولية ،ونتي تتهناي من الحسابات

والقلقة ،

وبالنسبة للام نتاعو تقريبا كامل العجائز عندهم نفس العقلية

نتي ثانيا كان لازم عليك ساعة ع ساعة تتفكريها بملبغ رمزي

بما انك عاملة أو هديه لها أو لأحدى بناتها

فالهدية تحبب القلوب

اسأل الله أن يفتح عليك ويهدي زوجك

__________________________________________________ __________

>>>> الرد الرابع :

معاناتك تشبه تقريبا اي معاناة فتاة عاملة
زوجك ما عندوش أي حق في دراهمك فهي خاصة بكي وحدكي وهو راه يقول في نفسه انو مخليك تخدمي قهاك؟ مافيها حتى شيء كي تعاونيه بصح زوجكي من النوع الذي يتمادى
اياكي ان تتركي عملكي فهو سلاحكي ماذا لو تغيرت الأمور وحب يطلقك لا قدر الله حتى العائلة لن تعينك لأنو ستتغير نظرتهم اليك وستصبحين عالة عليهم لذا لا انصحكي
أما بالنسبة لعجوزك فحاولي ان تسايريها و ساعة على ساعة مديلها هدية مش دراهم,, اشريهالها انتي من اختيارك هاك باه ما توالفش دراهمك
أطلب من الله عز
وجل في هاته الأيام المباركة أن يهدي زوجكي ويصلح شانه و يرزقه رزقا طيبا ويبارك لكما في علاقتكما ببعض

__________________________________________________ __________

>>>> الرد الخامس :

لأسف هذا حال وتفكير أغلب الرجال المتزوجين من عاملة إي واحدة لزم تعرف بأن السؤال الذي يطرحه الرجل ماذا سأجني عندما تذهب زوجتي للعمل؟؟؟؟؟؟ رضى عطفي نفسي ديني الاكيد هو مادي بحت وأغلبهم يرى أنه من حقه بعض أو كل الاجر، المهم ياخت حاولي التغيير لأن المشكل كان منذ اول يوم فكرتي في الارتباط وأنت عاملة دون ان يتم الفصل بشكل مطلق في اجرك الحل هو الادخار الشخصي لجزء من اموالك ولو مبالغ بسيطة للتمكن من تسيير أمورك الله يكون في عونك وفي عونك أكل أمرة عاملة متزوجة صبر جميل والله المستعان