عنوان الموضوع : كتف خروف محمر مع البطاطا حصريا من مطبخي طريقة جزائرية
مقدم من طرف منتديات العندليب

السلام عليكم اخواتي في الله
هده الوصفة عملتها بعد العيد نتمنى تنال اعجابكم الصراحة كانت فعلا لديدة و تليق للعرضات و سهلة في نفس الوقت نخليكم مع الصور ياربي و ننجح في ادخالهم على خاطر مانعرف

الوصفة ساهلة بزاف اولا التتبيلة
زبدة طرية ثوم حسب 6 سنات او خمسة ملح فلفل اسود فلف احمر (بابريكا) حلو او حار حسب الرغبة شوية قصبر مطحون معدنوس مقطع ادا حبيتي مغرف بصل مرحي ماتكثريش خلطي كلشي فالزبدة بحيث يجو كي المرهم .

تجيبي كتف او اي قطعة من الخروف تحبي تحمريها تديري فيه شقوق بالموس و تجيبي التتبيلة و و تدعكيه مليح مليح و تحاولي تدخلي فالشقوق باه يتشرب البنة مليح و تخليه يبات و لا ساعتين على الاقل كدا كنت مستعجلة
تجيبي بلا تاع الكوشة تحطيه فيها و تحطي معاه حوالي 1\نصف كوب ما و شو ية من التتبيلة اللي بقات و تحطي جزر مقطع ما تحطيش الخطار اللي ساهلين للطياب حت للاخير و تغطيه مليح بالالومنيوم و تشعلي من تحت على نار قاوية بزاف لمدة نصف ساعة و من بعد تدلي النار و تخليه لمدة ساعتين على نار هادئة و ساعة ساعة طلي عليه تزيد تنشف مرقتو لكن كي يكون مقفول مليح ما ينشفش المهم كي تشوفيه طاب مليح تشعلي من فوق و تبداي تحمري بالوجه و كي يتحمر الوجه الاول تكوني قليتي شوية بطاطا و ترميها في هداك المرق طبعا كي يعود يتحمر من فوق كل مرة هزي المرقة بالمغرف و حطي عليه باه يبقى طري و كي يتحمر مليح و ينشف طفي عليه و بالهنا و الشفاء .

ملاحظة يمكن تضيفي اي حاجة تحبيها فالتتبيلة حسب دوقك انا ما حبيتش نكثر التوابل باه ما يجيش طعمهم باين و تبقى البنة تاع اللحم باينة .


\\\\\\\\\\\\\\


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

raw3a manifique macha allah barak allah fik

__________________________________________________ __________

>>>> الرد الثاني :

اشهي يعطيك الصحة

__________________________________________________ __________

>>>> الرد الثالث :

يعطيك الصحة وين الطريقة اختي

__________________________________________________ __________

>>>> الرد الرابع :

يشهي بارك الله فيك رائع اختي

__________________________________________________ __________

>>>> الرد الخامس :

ياختي كيفاش طيبتي الكتف ؟درتيه وحدو طاب من بعد حطيتيه على البطاطا ؟
اعطيني الطريقة نتاع الكتف كيفاش طيبتيه وباش تبلتيه باش نديرها ان شالله في العاشورا اكتبيها في موضوع وحدها الى مونية ك باش نشوفها ماعليش بلا تصاور
ماتنساينيش
بصحتكم