عنوان الموضوع : غراتان الشفلور جديد x جديد من مطبخي
مقدم من طرف منتديات العندليب

السلام عليكم
اليوم فطرنا غراتان الشفلور جاء بنين و خفيف مالا حبيت نحطلكم الوصفة باه تجربوها و للامانة صور مراحل التحضير ليست من تصويري , صورت الغراتان كي خرج من الفرن فقط :





نبداو بسم الله
1- نحكمو راس شفلور نقطعوه وريدات , نشلوه و نحطوه يغلي في طنجرة فيها ماء + ورقتين رند +ملح + 2 فصوص ثوم بالقشر و لي تحب تنقيه و نخليه حتى يطيب و نصفيه مباشرة باه ما يشربش الماء



2- من جهة اخرى نقشر 4 حبات بطاطا ( ممكن اقل او اكثر حسب العائلة و لازم البطاطا تفرش كل الصينية ) , نقطعها مكعبات صغيرة و نقليها في الزيت نفرشها في الصينية و نرش قليلا من الملح على البطاطا الساخنة


3 - في مقلاة نحضر الحشوة : نذبل حبة بصل مبشورة في قليل من الزيت , نضيف اللحم المفروم او داند مفروم ( حوالي 300 غ ) او صدر دجاجة مسلوق و مفتت و نقليهم , نضيف 4 فصوص ثوم مدروش او مبشور رقيق + ملح + فلفل اسود + سكنجبير + قرفة + معدنوس و 6 و ريقات نعناع مقطع رقيق ونزيد 1/4 كاس ماء يعني الحشوة ما تكونش ناشفة بزاف نغطيها و نخليها حوالي 15 د على نار هادية .




4- صلصة البيشاميل : في كسرونة نذوب 80 غ مارغرين + 80 غ فرينة و نحركوها + 1 لتر حليب من الافضل ساخن و نحركوها حتى تغلي و تثقال
و نزيدو ملح و شويييية جوزة الطيب و لي تحب تزيد جبن مبشور



5 - فوق البطاطا المفروشة نفرغ 6 ملاعق كبار بيشاميل ثم نفرغ الحشوة + 3 ملاعق كبار بيشاميل و نرص فوقه الشفلور ( من الافضل نزع الجذور لي من الاسفل ) نفرغ باقي صلصة البيشاميل من فوق و نزينها بالجبن المبشور , ندخلها فرن مسخن 200° مدة 20 د من الاسفل ثم نحمرها من الاعلى و تاكلوها بالصحة







ملاحظة : خليها تبرد شوية من بعد قطعيها باه تشد روحها

نتمنى تجربوه و تقولولي رايكم


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

اممممممممممم هايلة نفس طريقتي بصح منديرش بطاطا يعطيك الصحة


__________________________________________________ __________

>>>> الرد الثاني :

اممممممممممممممممممممممممم يشهي يعطيك الصحة

__________________________________________________ __________

>>>> الرد الثالث :

بارك الله فيك يا اختي
تاكلوه بالصحة والهنا

طريقة سهلة وراهي بنينة
فقط الشوفلور نحب نفورو ,باش ما يرفدليش الماء مثل اللي تغليه..


__________________________________________________ __________

>>>> الرد الرابع :

يعطيك الصحة وبارك الله فيك

__________________________________________________ __________

>>>> الرد الخامس :

المشاركة الأصلية كتبت بواسطة sidali 2007
اممممممممممم هايلة نفس طريقتي بصح منديرش بطاطا يعطيك الصحة


يسلمك اختي sidali 2007 جربيه بالبطاطا و قوليلي رايك

المشاركة الأصلية كتبت بواسطة Fatima fato
اممممممممممممممممممممممممم يشهي يعطيك الصحة

يسلمك fatima fato

المشاركة الأصلية كتبت بواسطة خربشة ناعمة
بارك الله فيك يا اختي

و فيك بركة خربشة ناعمة
تاكلوه بالصحة والهنا
و

طريقة سهلة وراهي بنينة
فقط الشوفلور نحب نفورو ,باش ما يرفدليش الماء مثل اللي تغليه..

يسلمك و شكرا على فكرة التفوار المرة الجاية نجربها

المشاركة الأصلية كتبت بواسطة ايمان2009
يعطيك الصحة وبارك الله فيك

شكرا اختي ايمان