عنوان الموضوع : ♥► مـــــ(2)ـــن مطبخي : شــبــاح الصفـــــــرة ◄♥ من مطبخي
مقدم من طرف منتديات العندليب




أهلا بي عندكم وأهلا بكم في مطبخي

أمممم هاذي أول مشاركة ليا في هاذا القسم تع الأكلات

وتاني حبيت نبداها بحاجة حلوة ههه باه ندخل عليكم بلباراكة زعما احم احم

هاذي يعني ماهيش أكلة رئيسة

وماتندارش على أنها طبق يعني تع عشا متلا

هي تؤكل فن كيما نقولو ههه وتكون طبق اضافي يعني بعد ماتكوني تعشيتي

هنا الاغلبية نديروها في الاعراس كطبق ثالث

ولا في عرضة ولا في رمضان

الشبـــــــــاح الصـــــفـــــــــرة


آسفة المراحل مش ح يكونو مصورين بكل

ومام الصور لي كاينين راني هزيتهم من فيديو ( كي درناها فلعرس)

يعني لاكاليتي جات عيانة

بالصح المهم تفهمووو

نبداو بسم الله:

وش تحتاجي :

3 كيلات لوز مرحييي رقييييق خلاص

كيلة سكر

وتجمعي بصفار البيض

البياض نحتاجوه مبعدا في القلي

الطريقة :

نخلطو 3 كيلات لوز مع الكيلة تع السكر حتى يولي خليط متجانس

ونبداو نضيفو بالصفار الواحد

حتى تتلمنا العجينة وتعود سهلة التشكيل

هوا الشكل المتداول تاعها مثلث

تقدري ديري تاني هلال , نجمة , قلب ...

وتستعملي تاني الطوابع أحسن من التشكيل بليد

تجيك حبة وحدة ومتحوفة

بعدما نخلصي التشكيل

نروحو للقلي

نحطوها في بياض البيض



تم نقليوها في مقلة تيفال فيها زيت ديجا سخون

باه الحبة وحدها تطفو يعني ماتلصقلكش



هاذي القلية الأولى

نمسحوها بسارفيات تاع الورق (ماتكونش من لخفاف لي تطلق الترفوش)



ونعاودو القلية التانية

كيف كيف بنفس الطريقة يعني تحطيها في بياض البيض وتقليها



وكي نخلصي وتقطريها امسحيها تاني

وهكا تكون عندك واجدة باه تستعمليها



ومام هكا تقدري تخبيها فلكونجيلاتور في باط محكم الاغلاق وتخليها ووين تحتاجيها تجبديها

......

الطياب:

حبة بصلة مرابية مليح

شوية سمن

ملح (ماتكثريش كما فالطياب العادي)

فلفل أسود (لي يكون ابيض باه ميجيش يبان فلمرق)

وعود او عودين قرفة (لااازم)

وأكيد طرف لحم

تقليهم مليييح مع بعضاهم وتمرقي وتخلي لحم طييب

كما يطيب صفي المرقة تاعك

ورجعي الطرف تع اللحم ... وحطي السكر(درك حسب شحال درتي)

باه تعقاد المرقة وباه يولي طاجين لحلو بيان سور ههههه

(لكان عندك لمرقة بزاف حاولي تخليها تغلي شوية حتى تنشف لانو طاجين لحلو مايجيش فيه لمرقة بزاف)

هنايا دركا يجي دور الشبح الصفرة

ترميها وتخليها تغلي شوية

ماطولش بزاف

تحبي أرمي معاها فالأخير حبيبات لوز كاملين (يكون مقشر) للتزيين

وشهية طييبة



أنا هنا أني درت معاها تفاح محشي أيضا

ان شاء الله كما نديرو راني نحطهولكم بتفصيل

خير من بلهدرة برك

وتاني رميت حبات عين باه نزين (العين لازم تحطيها في ماء دافي لمدة قبل ماترميها)

نتمنى تكون عجبتكم

وبالهناء والشفاء





>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

عجبتني انا يا سالي
يعطيك الصحة اختي وان شاء الله ماتكونش ىخر مشاركة
عجبتني تاع ندخل عليكم بالبراكة هههههههه
تسلمي غاليتي

__________________________________________________ __________

>>>> الرد الثاني :

يعيشك ام عينيك لي ملاح ههه

إن شاء الله ماتخافيش اني هاذا وين بديت هيهيهي

الله يسلمك

شكرا



المشاركة الأصلية كتبت بواسطة amirateljazayer
عجبتني انا يا سالي
يعطيك الصحة اختي وان شاء الله ماتكونش ىخر مشاركة
عجبتني تاع ندخل عليكم بالبراكة هههههههه
تسلمي غاليتي



__________________________________________________ __________

>>>> الرد الثالث :

يعطيك الصحة نقولولها لحم لحلو بصحتكم

__________________________________________________ __________

>>>> الرد الرابع :

الله يسلمك

ومتشرفين ههه

المشاركة الأصلية كتبت بواسطة مونية ك
يعطيك الصحة نقولولها لحم لحلو بصحتكم



__________________________________________________ __________

>>>> الرد الخامس :

شباح السفرة هايل

مشكوووووووووووووورة