عنوان الموضوع : الْشْرِيك القسنطيني على أصول أصوله طبق جزائري
مقدم من طرف منتديات العندليب

السلام عليكم و رحمة الله تعالى و بركاته

بطلب من غاليالي"االمتحابات في الله"
جيت نشارككم بوصفة الشريك القسنطيني
نتمنى يعجبكم و تجربوه و تستمتعو بيه مع افراد عائلاتكم

ملاحظة فقط
هذه العجينة تصلح تعمل بيها شريك: فرينة+ سميد
او بريوش: فرينة فقط

نبداو بإسم الله

المقادير و هي جد بسيطة

250 غ فرينة+ 250غ سميد
4ملاعق كبار سكر/لي تحبه حلو تقدر ضيف السكر انا شخصيا نعمل 6 ملاعق كبار :d
4 ملاعق كبار زيت
4 ملاعق صغار خميرة الكسرة
شوية ملح
الحليب دافئ
ماء الزهر
زوج بيضات
زبدة

طريقة التحضير

فرينة+ سميد ضيفي عليها السكر+ الزيت+ الخميرة
بلي بالحليب دافئ مضاف له ماء الزهر كي قريب تكملي ضيفي الملح
اعجينها شوي بعدها
خلطي بيضة بالشوكة و ضيفي و اعجني
و زيدي البيضة الثانية بنفس الطريقة
راح تتحصلي على عجين يلصق باليد ديري شوي زيت لمي لعجين و خليه يخمر مليح
حتى يضاعف حجمه مليححححححح
بعدها ذوبي الزبدة/انا شخصيا نستعمل زبدة التوريق/
ضيفي بالشوي و اعجني
الزبدة ما تكثريش تقريبا 50 غ
بعدها لوزيهم و حطيهم في بلاطو مدهون بالزبدة و خليهم يخمرو للمرة الثانية
ادهنيهم بصفار بيضة و شوووية حليب
رشي عليه جلجلانية أو سكر لكي حرية الاختيار
و دخليهم الفرن
راه ما ياخدش وقت كبير في الطياب //غير نشم الريحة نطفي من تحت و نشعل عليه من فوق

صدقوني اخواتي راح تتحصلو على احلى شريك مع فطور الصباح اممممم
نتمنى يكون الشرح وافي خاصة و ان الموضوع مش مدعم بالصور :d
لكن راح نضيفهم غير يسهل ربي ان شاء الله

لكم مني اجمل تحية
خاصة حبيباتي لي نحبهم بزااااف


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

شكرا جزييييييييييييييلا اختي ام سراج
طليتي على قلبي
حابة نتعلمو

__________________________________________________ __________

>>>> الرد الثاني :

المشاركة الأصلية كتبت بواسطة قطيطوشة
شكرا جزييييييييييييييلا اختي ام سراج
طليتي على قلبي
حابة نتعلمو

شكرا حبيبتي و الله فرحتيني غير قلتي طليت على قلبك
نتمنى تجربيه و تنجحي فيه

__________________________________________________ __________

>>>> الرد الثالث :

انا ثاني حابة نديرو لكن لخميرة وين راهي

__________________________________________________ __________

>>>> الرد الرابع :

بإذن الله نجربو مادام جربوه المتحابات في الله هههههههههههه
سخفوني بالصور تاعهم
و أكيد يجي مليح كي مولاتو

__________________________________________________ __________

>>>> الرد الخامس :

اختي ام محمد تاج
شحال تدير كعبة هاد الكمية
ياريت حطيتيه قبل الفاتحة تاع اختي كومونديناه وماكان ماكان