عنوان الموضوع : كارثة مطبخية تحولت إلى طبق لذيذ طبخ جزائري
مقدم من طرف منتديات العندليب



الوصفة 18



البارح حبيت ندير السفيرية على طريقتي الخاصة ، أنا عمري لا كليتها ولانعرف كيفاه يديروها ، نعرف فقط عموما انها كريات بطاطا مقلية مع صوص بيضاء باللحم أو الدجاج و ماحبيتش نقرا الوصفة نتاعها ونتعلمها من المنتدى باش نجيب أفكار من راسي وندير حاجة جديدة.
ياسيدي ، لقيت البطاطا رخيصة شريت 10كغ وقلت نمتعهم بالبطاطا حتى وين تخرج على نيفهم .
روحت غليت حوال 1.5 أو 2كغ بطاطا في الماء ثم قشرتها وجيت نربزها بالفرشيطة بصراحة وجعني ذراعي من مجرد الفكرة قلت في بالي مالا الروبو واش نديرو بيه ، قارنيتور وخلاص ، حطيتها في الروبو تترحى واش نحكي واش نخلي عمري لاشفت البطاطا دارت هكذا كأنها غراء صيني ماحبتش تترحى خلاص وجيت نخرجها من الروبو ماحبتش تخرج لصقت كامل في بعضاها عجينة وحدة ماجيت نهبطها طار ذراعي وليت قلت نرحي الكمية اللي مازالت في رحاية اليد ...والو كانها مطاط وليت فرغتها في كاسرول وهي هكذاك نص مرحي ونص كتل وبقيت نتفرج واش نقوللكم أكثر من مجزرة الديول ...البطاطا في وجهي في يديا وفي قشي كامل هنا خرج الدخان من وذنيا آآآآآآآآآ خلاص قالي راسي نرميها ، تفكرت سلاحف النينجا مساكن غاضوني ، تعوذت من الشيطان الرجيم وفكرت ولثمة ضربت في راسي فكرة ، قلت هي خلات وطفرت مالا نغامر ونشوف :

1- البطاطا : كسرت عليها 4 بيضات وحطيت شوية ملح ( ماكثرتش ) وخلطتهم مليح معاها ودهنت المول نتاع الفور بالزبدة مليح وفرغت البطاطا فيه وإلى الفرن. كي تنفخت وحمارت من تحت حمرتها شوية من فوق وطفيت.
2- الصوص :
* قليت في شوية زيت حبة بصل كبيرة مقطعة بدون ملح وكي بدات تتحمر ( ماتخليوهاش تحمار ) ،أضفت صدر دجاج ( مقطع قطع صغيرة ) ونص علبة فطر

*وكي بدأ يتحمر أضفت الملح + فلفل أسود وثوم ورند +1 حبة جزر كبيرة يتيمة كانت في الثلاجة مسكينة + كمشة جلبانة

*وقليت شوية برك وأضفت ماء ( ماشي بزاف قدر ما تغطي المكونات فقط ).

*كي غلى المرق غلقت الكوكوط وخليتها على نار هادئة باش تنضج المكونات بدون أن ينشف المرق.
* بعد ما خليت البطاطا بردت حوالي 15د

مررت سكين على الحواف و قطعتها كأنها كيك وقدمتها في صحن وسقيتها بشوية مرق وخضر ودجاج وفطر وقدمتها مع كسرة رخسيس .


صراحة طبق لذيذ جدا مع أنني من الغضب ماكنتش في وعيي والله طبخت وماعلاباليش إذا المكونات هاذي مع بعض تعطي طبق لذيذ أو رايحين نباتو بلا عشاء .
الحمد لله مرت بسلام وتعشات عائلتي في جو من المرح وعجبهم الطبق مع أنهم مايعجبهم والو

حبيت نقول باللي ماشي ديما كي ندير مجزرة نرميها في المجاري لسلاحف النينجا هههههه راسي ساعة على ساعة يخرجني من المآزق هههه

تحياتي


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

مرحبا مرحبااااا يا العمرية
يعطيك الصحة هههههههههههههههههههههههههه راكي حرة من الحراير
مزيدا من النجاح والابداع
ويعطيك الصحة عالوصفات اللي درتي في الموضوع الاخر

__________________________________________________ __________

>>>> الرد الثاني :

اولا يعطيك الصحة عزيزتي الهام دايما نتعلمو منك كيفاش نخرجو من المازق الله عليك
انا ثاني لو كان كنت مكانك ما كنتش رميتعا و كنت عصرت مخي ودرتها قراتان لانو الحل الوحيد


__________________________________________________ __________

>>>> الرد الثالث :

ههههههههههههههه هااااااااااااااااي الهامممم الهام اواو

المهم حنونتي كي منعتي و مفجرتيش الكوزينة ههههههههههه

iهادي البطاطا تقدري دريها بصوص حمرا باللحم مرحي ومن فوق البيشامال ممممممممم

سلاحف النينجا درك تلقايهم قعين يصليو في صلاة الشكر لله تهناو اليوم من وصفاتك ههههههه

__________________________________________________ __________

>>>> الرد الرابع :

هههههههههههههههه وحدك يا الهام
اعطني نذوق قبل مانقول رأيي

__________________________________________________ __________

>>>> الرد الخامس :

هههههههههههههههههههههه

و الله يا إلهام دايما بعفايسك و ديما تقتلينا بالضحك و الله مانيش نضحك على الكارثة تعجبني طريقتك في السرد ههههههههههههه

بصحتك حبيبتي أكيد جاتك بنينة بعد المجزرة الرهيبة ههههههههههه

علابالي بيك شاطرة و تعرفي تنقذي نفسك من المواقف اللي كيما هذي
المرة هذي ما راحش تشاركيني ثاني في الطبق اللي درتيه يخي كامل ليا