عنوان الموضوع : دجاج كنتاكي المقرمش بالتتبيلة السحرية من مطبخي
مقدم من طرف منتديات العندليب

السلام عليكن اخواتي حبيت نقدملكم دجاج بطريقة سهلة ويجي لذيذ ومقرمش راح تحبوه خاصة الاولاد بالتتبيلة السحرية والغلاف اللي يخليه مقرمش ولذيذ
دجاج حسب الحاجة مغسول تزيدلو التتبيلة اللي عودتكم عليها واللي هي
في ميكسور حطي حبة متوسطة بصلة مقطعة+4سنات ثوم+ملعقة كبيرة هريسة+ملح +ملعقة صغيرة فلفل اسود+ملعقة صغيرة كمون+2ملاعق خل+شوية بابريكا وشوية كسبر مرحي+ 2ملاعق كبار زيت خلطي الكل شوية فقط
في صحن حطي قطع الدجاج ومعاها التتبيلة وزيدي الملح حسب الحاجة خلطي الكل بيدك حتى يتغلف الدجاج مليح بالتتبيلة وخلي الكل يرتاح في الثلاجة من الاحسن ليلة كاملة او اقل شيء ساعتين ثم حطيه في مول حطيه في مول



ودخليه للفرن على 200درجة حتى يطيب الدجاج ماشي شرط يتحمر


نحيه من الصوص وخليه يقطر


من بعد اغطسيه في حبة بيض مضربة مع شوية ملح

ومباشرة مرغديه في خبز مرحي او شابلير مرحي شوية خشين


وحطيهم في بلاطو نتاع الفرن من غير ماتدهنيه ودخليهم فرن ساخن حتى يتحمرو من فوق وتحت راح ياخدو تقريبا 5 د لان الدجاج طايب


والصوص اللي بقاتلك زيديلها مغرف صغيرة فرينة محلولة في زوج ملاعق ماء ورديها للفرن حتى تاخذ الغلوة فقط وتخثار


قدميهم مع سلاطو وفريت ولا كيما انا قدمتهم مع بطاطا مرحية









وهاذي صورة جماعية لصحون اولاد اخواتي


نتمنى ينال اعجابكم



>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

مممممممممممم تسلم الايادي عزيزتي روعة ما شاء الله ربي ما يحرمناش من طلتك البهية

__________________________________________________ __________

>>>> الرد الثاني :

المشاركة الأصلية كتبت بواسطة faizarbh
مممممممممممم تسلم الايادي عزيزتي روعة ما شاء الله ربي ما يحرمناش من طلتك البهية

الله يسلمك حبيبتي انا راني نبذل كل مجهودي في اني نبقى معاكم لكن الله غالب العمل خدالي كل وقتي

__________________________________________________ __________

>>>> الرد الثالث :

المشاركة الأصلية كتبت بواسطة ninafret
الله يسلمك حبيبتي انا راني نبذل كل مجهودي في اني نبقى معاكم لكن الله غالب العمل خدالي كل وقتي

ما عليش عزيزتي المهم ما تغيبيش علينا و تخلينا نتوحشو وصفاتك والله تعلمت منك حقيقة

__________________________________________________ __________

>>>> الرد الرابع :

اممممم يشهي بارك الله فيك في انتظار جديدك موفقة

__________________________________________________ __________

>>>> الرد الخامس :

ممممممممممممممممم حنونتي جاك تحفة اكيد لحبيبة نجربوا باين بنين شكرا حنونتي على الموضوع الرائع