عنوان الموضوع : ~~~ غرايف ~~~ او ~~~ بغرير ~~~ من مطبخي وبطريقتي المطبخ الجزائري
مقدم من طرف منتديات العندليب




موضوعي لليوم الغرااااااااايف ممممم اوكيما يقول البعض بغرير راح نوريلكم تحضيرهم بطريقتي في منطقتنا نديروهم بزاف خاصة عند دخول الاطفال للمدارس نديروا الفال كيعاد حلوين يتغداو بيهم ويحبوهم الاولاد بزاف أو تقدميهم وقت القهوة في المساء

تبعوا معايا
المقادير :


  • 400غ سميد
  • 300غ فرينة
  • م ك سكر
  • م ك حليب بودرة
  • م ك خميرة الخبز
  • ملح حسب الحاجة
  • 3 بيضات اذا كانت صغيرة أو 2 اذا كبيرة
  • ماء دافي




1/ حطي البيض في ماء دافي لانهم يكونو في الثلاجة


2/ خلطي المكونات الجافة مليح


3/ الان نبدا نضيف الماء تدريجيا حتي يكون عندنا عجين مبلل وجاري نوعا ما وندلك بكف اليد وراح يتكور شوي معليش نبقى ندلك بكف اليد بشكل دائري على القصعة حتى تتحلل الكوريات ملييح


4/ ونزيد نضيف الماء وندلك مليح مليح كي تغلب يدك اليمنى استخدمي اليسرى هههههه



** الغرايف نحب نخدمهم باليد يجيو أحسن من تاع الباتور وكاين حتى نتاع الروبو لكن باليد أفضل **


5/ دوركا فقصي البيض بالوحدة راح يكونو دافيين وخلطيهم برؤوس اصابعك باش يتحلوا في العجين وكملي الدلك

راح تلاحظي ان مكانش كويرات والعجين خدمتيه مليح وكيما يحب وراح يبياض شوي ويكون سائل


نخليوه يتخمر في وعاء ونغطي عليه نشعل الطابونة ونحط الطاجين يسخن ونحط قدامو الوعاء باش يتخمرا مايديوش الوقت




معذرة لم اصور عند الطلوع متاسفة لكن راح يطلعوا ويكونوا تخمروا مليح عند الحرارة طبعا ، لكن بعد التخمر اضيفي باكي خميرة الحلوى وحركي بالشوي وتتخلط الخميرة في الخليط وطيبي

نبدا بالطياب نستعمل الطريقة التقليدية ندهن الطاجين بصابون الطرف بالخف ونمسح بمنشفة نظيفة تكون صغيرة من بعد راح نرميها

ملاحظة : ماندهنش بين كل حبة وحبة لان راح يجي ذوق الصابون راح ندهن بين كل 3 حبات



ونحط كمية ونوسعها دائريا بالشوي ونغلق عليها بمغلاق يكون مرتفع شوي







هاهم بعد الطياب الحبة الاخيرة جات كبيرة لان الكمية لي بقات كامل فرغتها جات حبة شوووووي كبيرة




وقدميهم كيما تحبي
بالعسل ، بالسكر والزبدة ذائبة ، ...... حسب الذوق






ان شاء الله نكون افدتكم ويكونوا عجبوكم وتجربوهم





>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

اممممممممممممممم هايل بصحتكم

__________________________________________________ __________

>>>> الرد الثاني :

هايل جاك مثقب بزاف بارك الله فيك

__________________________________________________ __________

>>>> الرد الثالث :

هايل هايل يعطيك الصحة انا نطيبوا في مقلة نتاع البغرير هي جاية مسطحة لكن للاسف مايجينيش متقب هكا حبيت نسقسيك طاطا وعلاه تستعملي الصابون؟؟؟

__________________________________________________ __________

>>>> الرد الرابع :

رووووووووووووووووووووعة يامحترفة خرجولك هبال ممممممممممممممممممم
يسلم يديك حنونة ومزيدا من الابداع

__________________________________________________ __________

>>>> الرد الخامس :

بارك الله فيك