عنوان الموضوع : البايلا الاسبانية من مطبخي وبالصور المفصلة طريقة جزائرية
مقدم من طرف منتديات العندليب

بسم الله الرحمان الرحيم
كانت الاخت ra7ma02 طلبت مني وصفة البايلا في احدى مشاراكاتي في المنتدى
واليوم راح نحط ليكم كامل الوصفة باش تستفادو منها
الي علمني البايلا هو خويا لانه يطيبها في الاعراس احنا في المناطق الساحلية وبالبضبط شرق وهران معروفين بهاد العادة العريس صبيحة الخميس يعرض صحابه المقربين للبحر باش يودع العزوبية والغداء بايلا اسبانية او باسطا ايطالية
المهم انا خويا تعلمها من عمي وانا تعلمتها من خويا لكن انا نديرها للعائلة فقط ماشي في البحر ههههههههههههههه
على بركة الله



************1******* في مقلاة كبيرة نضع اللحم مع الزيت يتقلى ونبقى نقلب فيه ثم نضيفو عليه اطراف الدجاج حوالي ربع ساعة واحنا نقلي اللحم والدجاج في الزيت فقط البايلا مفيهاش البصل



***************2***********نحتاجو كروفيت - كلامار - سيبيا - وكيس فواكه البحر ممكن تستغناي عليه

************3*************حبات سمك كبار من الاحسن رسكاس واي اي نوع اخر نغليهم في الماء كمية معتبرة مع شوية ملح وفلفل

***************4***************بعد ربع ساعة الى 20 دقيقة نقلعو اللحم والدجاج ونحطوه في صنية وفي الزيت نحط الكلامار ونقلبوها غير بشوية

************5**********ثم نضيف الكرفيت فواكه البحر والثوم المفروم انا درت حوالي فنجان المقلى كبيرة


***************6************الصورة عن قرب الكرفيت -الكلمار -فواكه البحر

************7**********من جديد نضيف اللحم والدجاج الي قلعناهم للمقلى ونضيف الطمام تع الحبة مرحية حوالي صحن صغير

***************8************نمرق بالماء الي طيبنا فيه السمك ونزيدو الجلبان - الملح - الفلفل - الزعفران - الرند -

***********9*********السمك الي طيبناه نظفوه مليح من الشوك ونخلوه على جنب
*************10*************المرقة تاعنا طابت نذوقوها ونبنوها مليح ادا كانت ناقصتها حاجة

***********11***********ننزع من المقلاة حبات كرفيت حبات كلامار طرف دجاج نفتوه وطرف غنمي نفتوه ونتركوهم جانبا للديكور والباقي **************12************طبعا نخلوه في المرق ونرمي الروز المفور وطبعا نخلي شوية مرقة جانبا ممكن الروز من النوع الي يشرب

*************13****************وهاهو واجد

*************ملاحظة **************
المقلي الي درت فيها خاصة ب 25 فرد هنا كانت عندنا لمة عائلية
وبالنسبة لتكاليف البايلا مقلى من هدا النوع حوالي 4000الى 5000 من اللحوم والسماك انا ما درتش فيها القنين
حطي الروز في صحون ووزعي الكلمار والكرفيت واللحم والدجاج المفتت من فوق

بصحتكم ونتمنى اني افدتكم


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

واوو واووو يعطيك الصحة

__________________________________________________ __________

>>>> الرد الثاني :

الله يعطيك الصحةة تشهي



__________________________________________________ __________

>>>> الرد الثالث :

المشاركة الأصلية كتبت بواسطة om sirine
واوو واووو يعطيك الصحة

شكرا اختي الحبيبة تحياتي ليك

__________________________________________________ __________

>>>> الرد الرابع :

المشاركة الأصلية كتبت بواسطة mira27
الله يعطيك الصحةة تشهي

صح جارتي الله يحفظك سلامي لناس مستغانم

__________________________________________________ __________

>>>> الرد الخامس :

tbarekn allah khmouuusse 3lik kolilinti min men wahren ana me centre ville