عنوان الموضوع : اللحم المحمر في الكوكوط بطريقتي بالتفصيل الممل من مطبخي من مطبخي
مقدم من طرف منتديات العندليب

السلام عليكم
صباح الخير حبيباتي إن شاء تكونو صبحتو بخير
اليوم بإذن الله راح نوريلكم طريقتي في طبخ اللحم المحمر في الكوكوطة تعلمتها من أمي ربي يجيبلها الشفاء العاجل ... هي طريقة سهلة ماهلة ماتديش الوقت يجي طايب زبدة و خير من المقلي في المقلة
نجيبو الكوكوط نتاعنا نديرو فيها كمية من الزيت قيس نصف كأس و نحطو فوق النار


ممبعد نحط اللحم تاعنا أنا إستعملت لحم عجل و نخليه يتقلى على نار قاوية بدون إضافات و بلا مانحط الغطاء يعني نخليها هكذاك و نحرك مرة على مرة كأنك تقلىي فيه في المقلة و تشوفيه بدأ يتحمر من برى



في هذه الأثناء نحضر فصوص ثوم مقطعين دوائر و أوراق رند



هنا صايي تحمر من برى شوية




نضيف الملح و الفلفل الأسود و شرائح الثوم و الرند و نزيد تقريبا كاس أو أقل ماء حسب قساوة و كمية اللحم و نسكر الكوكوطة مليح و ندير الصفارة و نخليها على نار هاااادئة لمدة 1/2 ساعة




كي تفتحي تلقاي اللحم طايب زبدة و اللصوص عاقدة بذوق الثوم ورند ممممممم
ملاحظة إذا شفتو بلي لاصوص مانشفتش حطوها فوق نار بلا مغط و خلوا اللحم يتجمر حتى ينشف ويبقى غير الزيت



أنا قدمته مع أرز ... ممكن تقدميه مع خضرسوتي أو بوري أو سلطة منوعة





لذيذ جدا
ملاحظة : ماتكثروش التوابل في اللحم باش مايفقدش البنة نتاعو
دعوة خير


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

روعة ..... يا ام انس ...... نفس طريقتي تقريبا ... بصح انا نزيد حبة طماطم

__________________________________________________ __________

>>>> الرد الثاني :

يعطيك الصحة اختي جي روعة احسن طريقة مشكورة

__________________________________________________ __________

>>>> الرد الثالث :

كيما نطيبو انا يجي زبدة وما يتشبعش مممممممممممممممم
ربي يشيب الشفا لميمتك ويحفظهالك

__________________________________________________ __________

>>>> الرد الرابع :

ما شاء الله تباني شاطرة وشبعانة ربي يجزيك

__________________________________________________ __________

>>>> الرد الخامس :

يعطيك الصحه يشهي شكرا ليك وصفاتك كلها رائعه