عنوان الموضوع : Boudin او التعمير بالكفتة ممممممم من مطبخ lyzzabel المطبخ الجزائري
مقدم من طرف منتديات العندليب





رجعت لكم حبيباتي بموضوع جديد و لي هو التعمير بالكفتة او البودان نقدموه مع البركوكس ولا الطعام و يجي مممممممممم و هذا بعد طلب من العضوات الغاليات
بدون إطالة تفضلو المقادير

كمية من اللحم المرحي انا استعملت تقريبا 250 غ
فنجان تاع قهوة سميد متوسط او نصف غليظ مشي الرقيق و مشي الغليظ
بصلة متوسطة
سنات ثوم انا درت أربعة
قصبر و معدنوس مقطعين
بيضة
ملح
ربع م ص فلفل اسود
نصف م ص راس الحانوت
ربع م ص سكنجبير
ربع م ص كمون
ربع م ص قرفة مطحونة
كيس تاع السباقيتي نكون نظفته من قبل و طبعا غير ممزق

اولا نحمص السميد على نار هادية مع التحريك المستمر حتى يأخذ اللون الأسمر و مهم جداً يكونو كل الحبات عندهم لون واحد و نحطه في صحن يبرد شوية
من بعد نخلط كل المقادير المذكورة باستعمال اليد كما هو موضح في الصور






ثم نعمر الخليط في كيس السباقيتي و ندكه مليح للداخل باش يأخذ شكل الكيس و نحزمه بخيط و نكون خليت شوية فراغ خاطرش لما يطيب السميد راح ينتفخو الحبات تاوعه و لا ملهم المكان ،، و نثقب الكيس من كل النواحي باش يدخله الطياب و نرميه فالمرق لي غادي نحضر بيه البركوكس ولا الطعام و نغلق الكوكوطة و نخليه يطيب وحد نصف ساعة






مين يطيب نفتح الكوكوطة على مهل و ننحي الكيس و نحطه في صحن ولا وعاء و نخليه يبرد شوية ،، و من بعد نفتح الكيس من الطرف باستعمال المقص و ننحي البودان و نغطيه على الهواء و مين يوجد الطبق تاعي يعني البركوكس ولا الطعام ،، نقطع البودان الى دوائر او نصف دوائر و نقدمه معاهم من فوق ممممممم و شهية طيبة











نتمنى تعجبكم الوصفة لان البودان بهذه الطريقة فعلا راءع و طعمه لذيييييذ لا يقاوم و بريزونتابل لما يجوك الضيوف قدميهلهم مع الطعام و تقدري تزيدي البيض فايض و مقطع معاه و طبعا التزيين كل وحدة و شطارتها

نخليكم في أمان الله و طبعا تهمني آراءكم حبيباتي و ما تنسوووووش دعوة الخير
و السلااااام خير ختااااام و الحمد لله رب العالمين








>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

حكمت لبلاصة انا الااااااااولى
يهبل يهبل يهبل و يستحق التجريب
امممممم هبلتيني بيه قبيييييل في الكوزينه
يعطيك الف صحه

__________________________________________________ __________

>>>> الرد الثاني :

هههههه باتي ربي يخليك هذا من ذوقك حبيبتي ،، يالله نستنى اسرع تطبيييييق

__________________________________________________ __________

>>>> الرد الثالث :

واخيرا راني عندي مدة حابة نعرف واش فيه
ربي يبارك بديت نحس بالطعم في فمي
نوعدك نجربو قريبا ونتمنى يتثبت الموضوع لاهميته
ممتاااااااااااازة

__________________________________________________ __________

>>>> الرد الرابع :

شكراااا عطورة والله ردك فرحني بزاااااف الله يحفظك ،، مين تجربيه حطي الصور نشوفهم و طبعا رايك معاهم هههههه

__________________________________________________ __________

>>>> الرد الخامس :

مشاء الله اختى ليزا متميزة كى العادة
حبيت نعرف نقدر نبدل القديد فى وصفة التشيشة والا لالا
ما نكدبش عليك مانديروهش و ما عندى منين نجيبو