عنوان الموضوع : بربوشة او الكسكسي بمرق ابيض المطبخ الجزائري
مقدم من طرف منتديات العندليب



صباح الخير حبيباتي في الله اليوم جيبتلكم الكسكسي او البربوشة بمرق ابيض نديروه بزااف في باتنة سيرتو في العراس عمبالي كاين بزااف منكن يعرفوه و لكن هذي طريقتي انا و كاين بنات مايعرفوهش قلت نحط موضوع ان شاء الله يعجبكم
نبدأ على بركة الله

المقادير
بصل مرحي +ثوم
حبة طماطم وحدة مرابية مع قشورها

لحم خروف اذا مش متوفر تقدري ديري دجاج كيما انا و تقدري تخلطي لحم خروف +دجاج

ملح

كسبر مداوي "فيه مجموعة من التوابل " ليهو راس الحانوت

ما دافئ
هو المستحسن جريوات اذا كان عندك ضيوف و اما اذا كانت لدار كيما انا ديري بطاطا بصح لضيوف مانديروش بطاطا نديرو جريوات( نحافظ على تقاليد لعراس)
حمص طايب
فلفل اخضر

بربوشة رقيقة خلاص (تع المسفوف)
زبدة ولا لابال


الطريقة

ندوبو الزبدة + البصل +الثوم و نخليوهم يتقلاو مليح و مبعد نزيد حبة طماطم



نقليوهم مع بعض و نزيدو اللحم و الملح و الكسبر و نقصو النار و نخليوه يتقلى على نار خفيفة بعد مانكونو غطينا عليه تقدري ديري قيس فنجان ماء

و بعد مايتقلى نمرقوه

2- تحضير الكسكسي


انا البربوشة لستعملتها تع برا يعني المشرية
ندير الملح مع الزيت و نخلطها مليح


و مبعد نلوح عليها الماء و نخليها شوية زغيبة و نسيح الماء الزايد و نميل القسعة و نخليها حتى ينشف الماء



كي يبس الماء نعاود نحلها بيدنا بلاعقل باش ماتتلكعش


و مبعد نلوحا في الكسكاس و نفورها



نجبدها بعد ماتفور التفويرة الأولى و نرشها بالماء و نحرك بيديا ( عندك لاتتحرقي و نخليها ترتاح شوية و نرجعا للكسكاس تفور التفويرة الثانية نورمالمو بزايد عليها 2 تفويرات مي اذا شفتيها محتاجة 3 فوريها )


كي نخلصو نفرها ندهنوها بالزبدة و نخليها

نرجع للمرق

بعد مايطيب االحم
نجبدو اللحم بجيه و نحكمو المرق نصفيوه و نضيفولو البطاطا المقطعة ( البطاطا قادرة تفوريها اذا حبيتي مي كيطيب في المرق يولي عندها نكهة المرق و اذا ديرتي جريوات نفس الشيئ نضيفوها في هذي المرحلة ) و نلوحو حبة حار
نجبدو طرف من المرق قدر مغرف السكب نديرو فيها الحمص و نخليه يغلي معاها شوية و نطفي عليه و تقدري تضيفيه للمرق مي انا مانحبش نضيفو للمرق و نقدمها





و شهية طيبة ان شاء الله تعجبكم

ملاحظة
اذا تكعبركم الكسكسي فوتوه في الغربال تع البركوكس
غالبا مايتكعبرش مي اذا استعملتو البربوشة تع برا يقدر يتكعبر لأنو رقيق بزاف و مش مخدوم باليد



>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

امممممممممممممممممممم بربوشة تاع الشاوية الصح يعطيك الصحة شهتيني انا نديرها لكن المرقة ما تجينيش خاثرة


__________________________________________________ __________

>>>> الرد الثاني :

المشاركة الأصلية كتبت بواسطة nawel zed
امممممممممممممممممممم بربوشة تاع الشاوية الصح يعطيك الصحة شهتيني انا نديرها لكن المرقة ما تجينيش خاثرة

شكرااا اختي
الله يسلمك
المرقة نتاعها ماتجيش خاثرة

__________________________________________________ __________

>>>> الرد الثالث :

الله الله يالفحلة بربوشة حراير يعطيك الصحة بارك الله فيك على الشرح

__________________________________________________ __________

>>>> الرد الرابع :

امممممممم احنا نديروها حمرا كاش نهار نجربها 6

__________________________________________________ __________

>>>> الرد الخامس :

يعطيك الصحه والله طريقة جديدة عليا حنيا نديره حمرا وَبَارِكْ الله فيك